24 август куни Ўзбекистон ташқи ишлар вазири Абдулазиз Комилов Швейцариянинг фавқулодда ва мухтор элчиси этиб тайинланган Константин Оболенскийни қабул қилди. Бу ҳақда ТИВ матбуот хизмати хабар берди.
Ишонч ёрлиқларининг нусхаларини қабул қилган Абдулазиз Комилов элчини Ўзбекистонда фаолият бошлагани билан табриклаган ва унга юқори ва масъулиятли лавозимда муваффақиятлар тилаган.
Суҳбат чоғида икки томонлама ҳамкорликни кенгайтириш, хусусан, ташқи ишлар вазирликлари ўртасида сиёсий маслаҳатлашувлар ўтказиш, савдо-иқтисодий ва инвестициявий алоқаларни жадаллаштириш орқали муносабатларни ривожлантиришдан икки томон ҳам бирдек манфаатдор эканлиги қайд этилган.
«Афғонистондаги мавжуд ҳолатни ҳисобга олган ҳолда минтақадаги вазият, шу жумладан, Швейцария фуқароларини бу мамлакатдан эвакуация масалалари юзасидан фикр алмашилди», — дейилади хабарда.
Аввалроқ Ўзбекистоннинг Ироқдаги илк элчиси мамлакат президентига ишонч ёрлиқларини топширгани, Ўзбекистон Доминика билан дипломатик муносабатлар ўрнатгани тўғрисида хабар берилганди.
Изоҳ (0)