Qarshi shahrida Сobalt va Spark avtomobillari to‘qnashdi. Oqibatda Spark yo‘lovchisi tan jarohati olib, shifoxonaga yotqizildi. Bu haqda “Daryo”ga Qarshi shahar Yo‘l harakati xavfsizligi bo‘limi axborot xizmati inspektori Ahror Usmonov xabar berdi.
Qayd etilishicha, voqea 2021-yilning 16-avgust kuni kech soat 22:33 da sodir bo‘lgan.
“2021-yilning 16-avgust kuni soat 22:33 da Qarshi shahar Islom Karimov ko‘chasi va Nasaf ko‘chalari kesishgan chorrahada to‘qnashuv sodir bo‘lgan. Haydovchi T.G‘. boshqaruvidagi Cobalt Islom Karimov ko‘chasi bo‘ylab harakatlanib kelib, Nasaf ko‘chasidan kelayotgan haydovchi A.Z. boshqaruvidagi Spark bilan to‘qnashgan. Natijada Spark yo‘lovchisi tan jarohat olib, shahar shifoxonasiga yotqizilgan”, — deydi Ahror Usmonov.
Ta’kidlanishicha, ayni paytda hodisa yuzasidan tergov-surishtiruv jarayonlari olib borilmoqda.
Eslatib o‘tamiz, avvalroq Toshkentda Matiz ва Nexia to‘qnashuvi oqibatida uch kishi jarohatlangani, Samarqandda boshqaruvni yo‘qotgan Lacetti ikkita “Jiguli” va Damas‘ga urilishi oqibatida bir nafar yo‘lovchi voqea joyida vafot etgani xabar berilgandi.
Izoh (0)