Toshkentdagi Nurafshon aylanma yo‘lining 12 ta chorrahasiga “aqlli” svetoforlar o‘rnatiladi

Toshkent hokimi Jahongir Ortiqxo‘jayevning 14-avgustdagi qarori bilan poytaxt IIBB XBBning Nurafshon aylanma yo‘li bo‘ylab chorrahalarga “aqlli” svetoforlar o‘rnatish haqidagi taklifi ma’qullandi. Bu haqda “Gazeta.uz” xabar qildi.

Hujjat E-Qaror portaliga joylashtirilgan. Unga ko‘ra, yo‘l uskunalarini o‘rnatish ishlari bilan shahar hokimligining “Yagona buyurtmachi xizmati” injiniring kompaniyasi shug‘ullanadi. Loyiha mahalliy budjet hisobidan moliyalashtiriladi.

“Aqlli” svetoforlar Nurafshon yo‘lining Labzak, Sebzor, Qorasaroy, Sag‘bon, Farobiy, Beruniy, Bog‘, Ko‘kcha darvoza, Xumdonsoy, Samarqand darvoza, Oqlon 3-proyezd, Shimoliy Olmazor ko‘chalari bilan kesishmasiga o‘rnatiladi.

Uch oy davomida svetoforlarning ishlashi monitoring qilib turiladi. Toshkent shahar elektr tarmoqlari korxonasiga mazkur chorrahalarda elektr ta’minoti uzluksizligini ta’minlash topshirildi.

“Aqlli” svetoforlarni o‘rnatish prezidentning 2021-yil 1-apreldagi “Ilmiy va innovatsion faoliyatni rivojlantirish bo‘yicha davlat boshqaruvi tizimini takomillashtirish to‘g‘risida”gi farmonida ko‘zda tutilgan.

Qayd etilishicha, “aqlli” svetofor tafsilotlari ma’lum qilingani yo‘q, biroq Moskvadagi xuddi shunday svetoforlar kompyuter bilan bog‘langan. Ularni boshqaradigan dastur o‘zi qaror qabul qilishi, boshqa svetoforlar bilan “maslahatlashishi” va ular bilan sinxron ravishda ishlashi mumkin.