Qashqadaryoda jurnalist va blogerlar uchun ko‘p qavatli uylar qurilishi mumkin. Bu haqda viloyat rahbari Zoir Mirzayev bilan bo‘lgan muloqotda ma’lum qilindi, deya xabar berdi “Daryo” muxbiri.
Qayd etilishicha, Qashqadaryo hokimi Zoir Mirzayev 21-avgust kuni viloyatda faoliyat yurituvchi jurnalist va blogerlar bilan muloqot qilgan.
Hokim bilan ochiq muloqotda so‘z olgan “Daryo” muxbiri viloyatda jurnalist va blogerlarni qo‘llab-quvvatlash borasida amalga oshirilayotgan ishlar haqida fikr bildirib, ular uchun ham xuddi IIB xodimlari, harbiy xizmatchilar va DXX xodimlari kabi jurnalist va blogerlar uyini qurish taklifini o‘rtaga tashlagan.
“Taklif menga ham ma’qul. Bu bo‘yicha taklif bilan chiqamiz va ma’qullansa, Qarshi city hududidan ‘dom’ quramiz. Shuningdek, yana bir rejamiz qolib ketdi. Respublikadan ruxsat olsak, 15-20 nafar OAV vakilini haftalik xalqaro media-turlarga hokimlik hisobidan xizmat safariga jo‘natamiz”, — dedi viloyat rahbari.
“Daryo” muxbirining aniqlashtirishicha, ayni kunda respublikada Farg‘ona va Namangan viloyatlarida jurnalist va blogerlar uyi qurilib, foydalanishga topshirilgan.
Izoh (0)