“Manchester Siti” Jeyms Makeyti uchun takliflarni ko‘rib chiqishga tayyor

“Manchester Siti” yarim himoyachisi Jeyms Makeyti jamoani tark etishi mumkin. Hozirda “shaharliklar” futbolchi uchun taklif kutmoqda, deb xabar beradi Mundo Deportivo nashri.

Manbaga ko‘ra, klub rahbariyati futbolchini sotishga tayyor, ammo uni arzon narxda qo‘yib yubormoqchi emas. Fransiyaning “Lion” klubi Jeymsni o‘z safiga qo‘shib olmoqchi edi, biroq keyinchalik tomonlar transfer summasi bo‘yich kelisha olmadi va muzokaralar yakunlandi.

Hozirda Makeyti uchun asosiy da’vogar “Nottingem Forest” hisoblanadi. “O‘rmonchilar” 22 yoshli ingliz futbolchisi uchun 29 million yevro to‘lashga tayyorligini bildirgan, ammo “Manchester Siti” bu taklifni rad etdi. Manbaga ko‘ra, “shaharliklar” futbolchi uchun 40 million yevro talab qilmoqda, lekin xaridorlar bu summani berishni istamayapti.

Ma’lumot uchun, 2024/25-yilgi mavsumda Jeyms Makeyti “Manchester Siti” safida jami 27 ta o‘yinda maydonga tushib, o‘z hisobiga 7 ta gol yozdirib qo‘ygan. Transfermarkt portali futbolchining qiymatini 20 million yevroga baholamoqda.