Eron hukumati 3-avgust kuni mamlakatda yangi Milliy mudofaa kengashi tashkil etilganini e’lon qildi. Davlat OAVga ko‘ra, tuzilmaning vazifasi mudofaa rejalari va qurolli kuchlar salohiyatini markazlashtirilgan tarzda baholashdan iborat bo‘ladi. Bu haqda fors nashrlariga tayanib, Al Arabiya xabar berdi.
Ma’lum qilinishicha, yangi tuzilma Eron prezidenti Mas’ud Pezeshkiyon rahbarligida faoliyat olib boradi. Kengash tarkibiga parlament spikeri, Oliy sud rahbari, qurolli kuchlar qo‘mondonlari hamda tegishli vazirliklar vakillari kiradi.
Kengash tuzilishi mamlakat konstitutsiyasining 176-moddasi asosida, Oliy milliy xavfsizlik kengashi — Eronning oliy xavfsizlik organi tomonidan tasdiqlangan. Ayni paytda, mamlakat armiyasi bosh qo‘mondoni Amir Hatami 3-avgust kuni bergan bayonotida Isroil tomonidan bildirilayotgan tahdidlarni hanuz jiddiy deb atagan.
“Dushmanning 1 foizlik tahdidini ham 100 foizlik xavf deb baholash kerak. Tahdidlarni kam baholamasligimiz va dushman harakatlarini tugadi deb hisoblamasligimiz lozim,” degan Hatami.
Uning aytishicha, Eronning raketa va dron qudrati “operatsiyalar uchun doimiy shay holatda” saqlanmoqda.
Ma’lumot uchun, iyun oyida Isroil va AQSH tomonidan Eron hududiga jumladan, yadro inshootlariga qarshi hujumlar uyushtirilgan edi. Bu voqea “12 kunlik urush” nomi bilan tilga olinadi. Tehron bunga javoban yahudiy davlatiga qarshi raketa va dron zarbalari bilan javob bergan. Shundan so‘ng, bu urush Vashington vositachiligida otashkesim kelishuvi bilan yakunlangan. Isroil mudofaa vaziri Kats iyul oyida yana tahdid bo‘ladigan bo‘lsa, Tehronga qarshi zarbalar davom ettirilishini bildirgandi.
Izoh (0)