Prezident Shavkat Mirziyoyevga ishbilarmonlar tomonidan yo‘llangan murojaatlarning ko‘pida biznesni moliyalashtirish manbalarini yanada ko‘paytirish maqsadida nobank kredit tashkilotlarini ochish va yuritishga bo‘lgan mavjud talablarni kamaytirish va yengillashtirish so‘ralgan. Bu haqda davlat rahbari so‘z yuritdi, deya xabar bermoqda “Daryo” muxbiri.
“Bu masala Andijondan Almaz finans korxonasi rahbari Olimjon Oxunov va Jizzaxdan Diamond-N korxonasi rahbari Sherzod Soatovning murojaatlarida ham ko‘tarilgan. Bu takliflar bizga juda ma’qul. Shuning uchun 2021-yil 1-oktabrdan mikro-moliya tashkilotlarini litsenziyalash tartibi to‘liq bekor qilinadi. Endi ular faoliyatini boshlashi uchun faqatgina Markaziy bank reyestriga kirishlari kifoya.
Shuningdek, bundan buyon ularga kassa xonalari tashkil etish, hududlarda filiallar ochish uchun Markaziy bankning roziligini olish shart bo‘lmaydi. Ular tomonidan tadbirkorlarga beriladigan mikrokredit (300 million so‘m) va mikrolizing (600 million so‘m) uchun amaldagi cheklovlar ham olib tashlanadi. Shu bilan birga, mikromoliya tashkilotlariga boshqa tashkilotlardan mablag‘lar jalb qilish, obligatsiyalar chiqarish huquqlari ham beriladi.
Mazkur tashkilotlar xuddi banklar kabi to‘lovlarni qabul qilish vakolatiga ham ega bo‘ladilar. Umuman, ushbu yangi imkoniyatlar hisobidan ham, kredit bozorida tadbirkorlarimiz uchun yiliga qo‘shimcha 10 trillion so‘m mablag‘ shakllanadi”, — deydi Mirziyoyev.
Avvalroq Shavkat Mirziyoyev soliq idoralari qo‘llayotgan ayrim jarimalar sonidan xavotirda ekanligi, inflyatsiya darajasini kelgusi ikki yilda 5 foizga tushirish reja qilingani, O‘zbekistonda tadbirkorlarga kreditni milliy valyuta — so‘mda berish tizimi yo‘lga qo‘yilishini ma’lum qilgandi.
Izoh (0)