2021 йил якунига қадар тўлиқ хусусий инвестициялар ҳисобига 8 та иссиқлик ва қуёш электр станциялари ишга туширилади. Бу ҳақда Президент Шавкат Мирзиёев қайд этди, дея хабар бермоқда «Дарё» мухбири.
«Бизнес учун зарур бўлган инфратузилма муаммоларини 3 мингга яқин тадбиркорлар кўтарган.
Шунинг учун келгуси йил 1 январдан бошлаб қиймати 200 миллиард сўмга тенг лойиҳалар бўйича электр, табиий газ, сув тармоқлари ва йўл инфратузилмасини етказиб бериш тўлиқ давлатнинг зиммасида бўлади. Бу имтиёз ҳозирги кунгача фақатгина 50 миллион доллардан ошадиган хорижий инвесторлар лойиҳаларига қўлланиб келинмоқда.
Электр энергиясидаги узилишлар кўпчилик тадбиркорларимизни безовта қилаётгани ҳам айни ҳақиқат. Бу масала бўйича ҳар бир туман, шаҳар ва маҳалла кесимида алоҳида дастурлар амалга оширилмоқда.
2021 йил 1 ноябргача 4 мингта трансформаторни алмаштириш, 35 та подстанция, 15 минг километр тармоқларни янгилаш ишлари якунига етказилади. Бу ишларни амалга ошириш учун жорий йилнинг ўзида илк бор 3 триллион сўм маблағ ажратганмиз. Олдинги йилларда бу ишларнинг 10 фоизи ҳам бўлмаган.
Агар таҳлил қилиб кўрсак, сўнгги 5 йилда электр энергияси истеъмолчиси бўлган тадбиркорлар сони 25 фоизга, уларнинг истеъмол ҳажми 30 фоизга ошган.
Шу боис электр энергияси ишлаб чиқариш ҳажмини кескин ошириш мақсадида тарихимизда илк бора бу соҳага тўғридан-тўғри хорижий ва хусусий бизнес кириб келди.
Натижада, шу йил якунига қадар тўлиқ хусусий инвестициялар ҳисобига, умумий қуввати 1 минг 800 мегаватт бўлган 8 та иссиқлик ва қуёш электр станциялари ишга туширилади. Энергетика вазирлиги келгуси йилларда бу каби лойиҳаларни кескин кўпайтириб, 2023 йилга қадар электр энергияси бўйича қўшимча ишлаб чиқариш қувватларини 4 минг 400 мегаваттга ошириши шарт», — деди давлат раҳбари.
Эслатиб ўтамиз, айни пайтда Тошкент шаҳридаги Ўзбекистон халқаро анжуманлар саройида Шавкат Мирзиёевнинг тадбиркорлар билан очиқ мулоқоти бўлиб ўтмоқда. Ушбу тадбирда давлат раҳбари солиқ идоралари қўллаётган айрим жарималар сонидан хавотирда эканлиги, инфляция даражасини келгуси икки йилда 5 фоизга тушириш режа қилингани, Ўзбекистонда тадбиркорларга кредитни миллий валюта — сўмда бериш тизими йўлга қўйилишини маълум қилди.
Шунингдек, ташаббус кўрсата олмайдиган, янги-янги ғояларни кўтариб чиқишга, ўзгариш қилишга интилиши бўлмаган раҳбарларга нисбатан жуда қаттиқ талаб ва чоралар бўлишини айтди.
Тадбир олдидан мамлакатда ишбилармонлик муҳитини ривожлантиришга муносиб ҳисса қўшиб келаётган тадбиркорларнинг бир гуруҳига давлат раҳбари номидан миннатдорчилик хатлари топширилди.
Изоҳ (0)