Prezident Shavkat Mirziyoyevga ishbilarmonlar tomonidan umumiy ovqatlanish va turizm korxonalaridan o‘tgan yili berilgan imtiyozlarni uzaytirish bo‘yicha 300 dan ortiq murojaatlar kelib tushgan. Bu haqda davlat rahbari tadbirkorlar bilan o‘tkazilayotgan muloqotda ma’lum qildi, deb xabar beradi “Daryo” muxbiri.
Pandemiya davom etyapti va bu xizmatlar sohasi, ayniqsa, umumiy ovqatlanish va turizm korxonalari uchun qanchalik og‘ir bo‘layotganini, barchamiz ko‘rib turibmiz, albatta. Bu borada umumiy ovqatlanish va turizm korxonalaridan o‘tgan yili berilgan imtiyozlarni uzaytirish bo‘yicha 300 dan ortiq murojaatlar kelib tushgan.Shu bois jami 13 mingta umumiy ovqatlanish korxonasini yil yakuniga qadar yer va mulk solig‘idan ozod qilamiz. Bu imkoniyat ularga 30 milliard so‘m qo‘shimcha ko‘mak deganidir. Ularning boshqa soliqlardan mavjud 35 milliard so‘m qarzlari muddatlari joriy yil yakunigacha uzaytiriladi, kreditlarini qaytarish ham kechiktiriladi.
Shu bilan birga, turizm kompaniyalari va mehmonxonalarni turistik yig‘imlardan 2 yil muddatga ozod qilsak, nima deysizlar? Bu – hozirgi qiyin sharoitda tushumi kamayib ketgan 2 ming nafar tadbirkor ixtiyorida 150 milliard so‘m qoladi, degani.
Shavkat Mirziyoyev, O‘zbekiston Prezidenti
Mavzuga doir: O‘zbekistonda ko‘chma savdo va mavsumiy kafelarning ishlash tartibiga oid nizom tasdiqlandi
Eslatib o‘tamiz, O‘zbekistonda koronavirus bilan kasallanish holatlari ortib borayotgani inobatga olinib, Respublika maxsus komissiyasining qarori bilan 2021-yilning 28-iyunidan mamlakatdagi umumiy ovqatlanish obyektlari — kafe, oshxona va choyxonalarning ishlashiga soat 08:00 dan 20:00 gacha ruxsat berilgandi. 20-iyuldan esa ularning soat 08:00 dan 20:00 gacha faqatgina ochiq havoda ishlashiga ruxsat berilishi belgilangan.
Turli hisob-kitoblarga ko‘ra, mamlakatda 2 milliondan ortiq kishi kafe-restoranlar va u yoki bu darajada ularga aloqador bo‘lgan sohalarda faoliyat yuritadi. Restoratorlar ko‘plab odamlar pulsiz qolishi haqida ogohlantirgan.
Shu sababli Oliy Majlis deputatlari 17-iyul kungi majlisda ovqatlanish maskanlari bo‘yicha cheklovlarni yengillashtirishni taklif qildi. Tadbirkor Zafar Hoshimov va Telegram’dagi “Davletovuz” kanali ham koronavirusga qarshi kurashda kafe-restoranlarni qurbon qilmasdan, ularga qo‘yilgan cheklovlarni yengillashtirishni so‘rab, umumiy ovqatlanish korxonalari epidemiya sharoitida ishlashi borasida bir qator o‘zgartirishlar kiritishni taklif qildi. Keyinroq Maxsus komissiya qarori bilan umumiy ovqatlanish obyektlari faoliyatiga karantin cheklovlari tatbiq etilmaydigan holatlar belgilandi.
Izoh (0)