“O‘zbekneftgaz” AJ boshqaruvi raisi Mehriddin Abdullayev boshchiligidagi ishchi guruh a’zolari konlarda olib borilayotgan ishlar va konda ishlayotgan ishchi xodimlarning yashash sharoitlari bilan yaqindan tanishish maqsadida Ustyurt gaz qazib chiqarish boshqarmasida bo‘ldi.
O‘rganish ishlaridan avval Ustyurt gaz qazib chiqarish boshqarmasi mas’ullari tomonidan “Sharqiy Berdaq” konida tashkil etilgan shtabda tabiiy gaz qazib chiqarish hamda uglevodorodlar zaxirasi hajmini oshirish borasida amalda qilinayotgan ishlar, rejalar borasida taqdimot o‘tkazildi.
Ustyurt gaz qazib chiqarish boshqarmasida 2021-yilning o‘tgan davri mobaynida tabiiy gaz qazib chiqarish reja ko‘rsatkichlarining bajarilishi muhokama qilindi hamda o‘rganib chiqildi.
2021-yilning yanvar—iyul oylari davomida boshqarmada 2,1 milliard kub metr tabiiy gaz qazib chiqarilishiga erishildi va reja ko‘rsatkichi ortig‘i bilan, ya’ni 105,8 foizga bajarilishga erishildi. O‘tgan yilning mos davriga nisbatan o‘sish sur’ati 113,1 foizni tashkil etdi.
Shuningdek, 32,7 ming tonna gaz kondensati qazib chiqarildi, bu borada esa reja ko‘rsatkichi 102 foizga bajarildi. Gaz kondensati qazib chiqarilishi borasida o‘tgan yilning mos davriga nisbatan o‘sish sur’ati 102,7 foizni tashkil etdi.
Taqdimot davomida tabiiy gaz qazib chiqarish reja ko‘rsatkichlarining bajarilishini ta’minlashga qaratilgan jami 48 ta geologo-texnik tadbirlar amalga oishirilgani borasida axborot berildi.
Shundan 24 ta yangi gaz quduqlari burg‘ilashdan keyin ishga tushirilib, 20 ta mavjud gaz quduqlarida kapital ta’mirlash va intensifikatsiya ishlari olib borildi, texnologiya yo‘nalishda esa 4 ta tadbirlar amalga oshirilgani bo‘yicha ham hisobotlar tinglandi.
Ta’kidlash kerakki, ijobiy natijalarga erishish uchun uzunligi 14,4 kilometr bo‘lgan 3 ta gaz quvurlari ishga tushirildi va bitta texnologik obyektda rekonstruksiya ishlari ham amalga oshirildi. Ushbu tadbirlarni amalga oshirish hisobidan jami 451,5 million kub metr gaz qazib chiqarishga erishildi.
Belgilangan ko‘rsatkichlarni ortig‘i bilan bajarilishida, “O‘zbekneftgaz” AJ ichki imkoniyatlaridan ham keng foydalanildi, jumladan, yangi burg‘ilangan quduqlarni, gaz kollektorlarini ishga tushirishni tezlashtirish uchun boshqarmalar ichki resurslaridan turli o‘lchamdagi jami 17,5 kilometr quvurlar yetkazib berildi.
Boshqaruv raisining tashabbusi bilan gaz qazib chiqarish hajmini yanada oshirish uchun, 2021-yil yakuniga qadar 68 ta geologo-texnik tadbirlarni amalga oshirish rejalashtirilgan (16 ta gaz quduqlarini burg‘ilishdan ishga tushirish, 50 ta gaz quduqlarida kapital ta’mirlash va intensifikatsiya ishlari olib borish va texnologiya yo‘nalishida 2 ta obyektlarni ishga tushirish). Belgilangan vazifalarning bajarilishi 956,4 million kub metr tabiiy gaz qazib chiqarishga zamin yaratadi.
Taqdimotdan so‘ng boshqaruv raisi boshchiligidagi ishchi guruh a’zolari “Sharqiy Berdaq” konidagi yangi burg‘ilashdan ishga tushirilgan 96-sonli quduqda bo‘lib, ushbu quduq usti jihozlash ishlari va quduqning ishlash texnologik ko‘rsatkichlari bilan tanishdi.
Shuningdek, “Quyi Sharqiy Berdaq” konida 2, 3-sonli izlov quduqlarida olib borilayotgan burg‘ilash ishlari hamda “Sharqiy Berdaq” 13-son qudug‘ida olib borilayotgan to‘la ta’mirlash ishlarining holati bilan yaqindan tanishildi.
O‘rganish natijalari bo‘yicha quduqlarda olib borilayotgan burg‘ilash va kapital ta’mirlash ishlarini yanada jadallashtirish hamda mavjud muammoli masalalarni hal etish bo‘yicha tegishli departament va boshqarma boshliqlariga vazifalar belgilandi.
Quduqlardan gaz qazib olishni jadallashtirish bo‘yicha kapital ta’mirlash va intensifikatsiya ishlarining olib borilish jarayonlari joyida o‘rganilib, tegishliligi bo‘yicha mas’ul hamda rahbar xodimlarga ishlar taqsimlandi.
Kon va quduqlarni loyiha hujjati asosida belgilangan ko‘rsatkichlarga hamda texnologik rejimlarga qattiq rioya qilinishi yuzasidan tegishli xodimlarga ko‘rsatmalar belgilandi.
Boshqaruv raisi tomonidan amalga oshirilayotgan tadbirlarning ijrosini o‘z vaqtida ta’minlash maqsadida texnologik obyektlarni ishga tushirish uchun loyiha ishlab chiqish ishlari, zarur bo‘lgan 7,2 kilometr, diametri 426 va 273 millimetrlik quvurlarni yetkazib berish borasida topshiriqlar berildi.
Bundan tashqari, Muborak gazni qayta ishlash zavodi ichki imkoniyatdan ajratilgan texnologik apparatlarni yetkazib kelishni jadallashtirish zarurligi ta’kidlandi.
Eslatib o‘tamiz, boshqaruv raisi boshchiligidagi ishchi guruh a’zolari tomonidan Ustyurtda tabiiy gaz qazib chiqarish ishlari holatining o‘rganilishi davom etadi.
“O‘zbekneftgaz” AJ matbuot xizmati
Izoh (0)