Афғонистон демократик давлатга айланмайди, унда шариат қонунлари амал қилади. Бу ҳақда «Толибон»нинг юқори лавозимли аъзоси Ваҳидулла Ҳошимийга таяниб, «РБК» хабар берди.
«Демократик тизим умуман бўлмайди, чунки бизнинг мамлакатимизда унинг ҳеч қандай пойдевори йўқ», — деди у. Ҳошимий, шунингдек, мамлакатда сиёсий тизим ҳақида ҳеч қандай мунозара ўтказилмаслигини таъкидлади, чунки у қандай бўлиши аниқ ва равшан.
«Бу шариат қонунлари, вассалом», — деди «Толибон» вакили.
Унинг сўзларига кўра, Афғонистонда ҳокимият тузилмаси «Толибон» ҳукмронлигининг аввалги даври: 1996 —2001 йиллардаги давлат тузилишига ўхшаш бўлади.
20 йил олдин «Толибон» ҳукмронлиги даврида мамлакатда шариат қонунларига қаттиқ тартибда риоя қилинган. Аёлларнинг позицияси энг қийин бўлган. Қизлар мактабга бора олмасди, вояга етган аёлларга эса паранжисиз ва эркаклар ҳамроҳлигисиз уйдан чиқишга рухсат берилмаган. Қоидабузарларга жисмоний жазо ёки қатл тайинланар эди. Август ойи бошида БМТ «Толибон» босиб олган ҳудудларда аёллар, инсон ҳуқуқлари ҳимоячилари ва ОАВ ходимларининг оммавий қатл қилиниши ҳақида ҳисобот берди.
15 август куни «Толибон» Афғонистоннинг бутун ҳудудини ўз назоратига олганини ва ҳукумат кучлари билан қуролли тўқнашув тугаганини эълон қилди. Шундан сўнг «Толибон» ҳаракати биринчи марта матбуот анжумани ўтказди.
«Мамлакатимиз мусулмон мамлакати бўлган ва шундай бўлиб қолади, аммо 20 йил аввалги ҳолат билан ҳозиргиси ўртасида катта фарқ бор. Биз аввалгидай иш кўрмаймиз», — деди ҳаракат матбуот котиби Забихулла Мужоҳид.
Унинг маълум қилишича, «Толибон» дунё майдонида ҳеч ким билан душманларча муносабатда бўлишни истамайди. Шунингдек, «Толибон» аёллар ҳуқуқларига шариат доирасида амал қилишга ваъда берди.
Матбуот анжуманидан кўп ўтмасдан «Толибон» ҳаракатининг аъзолари Нангарҳорда намойишчиларни ўққа тутгани ҳақида хабар берилди.
Изоҳ (0)