Qashqadaryo viloyati Qarshi tumanidagi savdo markazida mast fuqarolar janjal keltirib chiqardi, deya xabar bermoqda viloyat IIB axborot xizmati.
Ma’lum qilinishicha, 2021-yil 14-avgust kuni Qarshi tumani IIB navbatchilik qismiga kelib tushgan xabarga ko‘ra, tuman markazida joylashgan “Sim-Sim” savdo markazida, taxminan, soat 22:00 larda mazkur tumanda yashovchi O.Q. va sherigi X.Yo. bilan birga o‘tirib ovqatlanib, u yerda spirtli ichimlik iste’mol qilib, “Sim-Sim” savdo markazidan, taxminan, soat 00:00 larda tashqariga chiqqan.
Ular savdo markazi oldida o‘tirgan fuqarolar A.F., R.R. va I.J. bilan o‘zaro tortishib qolgan. O.Q. janjalda I.J.ning yuz qismiga urgach, o‘rtada janjal yuzaga kelib, janjalga X.Yo. ham qo‘shilgan.
Mazkur holat Qarshi tumani IIB navbatchilik qismida qayd etilib, tergovga qadar surishtiruv harakatlari olib borilib, tuman IIB huzuridagi TB tomonidan fuqarolar O.Q va X.Yo.ga nisbatan Jinoyat kodeksining 277-moddasi 2-qismi “b” bandi (bir guruh shaxslar tomonidan sodir etilgan bezorilik) bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda.
Bundan avval Samarqandda go‘zallik salonida ishlaydigan ayolni mast erkak ayovsiz kaltaklagani, Nukusda kafe egasi mijoz bilan janjallashib, uni o‘ldirib qo‘ygani hamda Toshkentda qovun-tarvuz sotuvchisi va IIB xodimlari o‘rtasida janjal aks etgan video yuzasidan izoh berilgani haqida xabar berilgandi.
Izoh (0)