O‘zbekistonda 24-oktabr kuni o‘tkaziladigan prezident saylovi munosabati bilan siyosiy partiyalarga ayrim ommaviy tadbirlarni o‘tkazishiga ruxsat berildi. Bu haqda Sog‘liqni saqlash vazirligi xabar qildi.
Qayd etilishicha, O‘zbekistonning Saylov kodeksiga muvofiq, O‘zbekiston Prezidentligiga nomzodlarga va siyosiy partiyalarga saylovchilar bilan uchrashuvlar o‘tkazish orqali tashviqot olib borish huquqi ta’minlanadi. Saylovchilar bilan uchrashuvlar nomzodlar va siyosiy partiyalar tomonidan mustaqil ravishda o‘tkaziladi.
Shu munosabat bilan Respublika maxsus komissiyasining navbatdagi yig‘ilishida siyosiy partiyalarning saylovoldi jarayonlarda faol ishtirok etishi uchun zarur shart-sharoit yaratish, ushbu muhim siyosiy jarayonda siyosiy partiyalarning qonun bilan kafolatlangan saylovoldi tadbirlarini amalga oshirishlarini ta’minlash bilan bog‘liq ayrim masalalar ko‘rib chiqildi.
Xususan, komissiya qarori bilan O‘zbekistonda faoliyat ko‘rsatuvchi siyosiy partiyalarning O‘zbekiston Prezidenti saylovi kampaniyasini yuqori saviyada xalqaro standartlarga mos ravishda o‘tkazish maqsadida saylov to‘g‘risidagi qonun hujjatlariga muvofiq O‘zbekiston Prezidentligiga nomzodlarga va siyosiy partiyalarga saylovchilar bilan uchrashuvlar kabi ommaviy tadbirlarni o‘tkazish to‘g‘risidagi takliflari ma’qullandi.
Bunda siyosiy partiyalarga saylovchilar bilan uchrashuvlar o‘tkazishda ishtirokchilar o‘rtasida ijtimoiy masofani saqlash, tibbiy niqobda bo‘lish, antiseptik vositalardan foydalanishga rioya etish kabi sanitariya-gigiyena va karantin talablariga rioya etishga hamda uchrashuvlarga taklif etilayotgan fuqarolarning koronavirus infeksiyasiga qarshi emlanganligiga e’tibor qaratish tavsiya etildi.
Bundan avval Markaziy saylov komissiyasi 5 ta siyosiy partiya vakillariga Prezident saylovida ishtirok etish uchun guvohnoma topshirgani, chet eldagi O‘zbekiston fuqarolari uchun 49 ta davlatda statsionar va ko‘chma saylov uchastkalari tashkil etilishi hamda O‘zbekiston Prezidenti saylovlarini o‘tkazish uchun saylov okruglari tashkil etilgani haqida xabar berilgandi.
Izoh (0)