Samarqandda go‘zallik salonida ishlaydigan ayolni mast erkak ayovsiz kaltakladi

Samarqand viloyati Jomboy tumanida joylashgan go‘zallik salonida mast erkak bir ayolni do‘pposladi. Bu haqda “Markaziy studiya” informatsion dasturida ma’lum qilindi.

Aniqlanishicha, janjal 11-avgust kuni Jomboy tumanidagi sartaroshxonaga o‘g‘illarini olib kelgan ayolga fuqaroning shilqimlik qilishi oqibatida kelib chiqqan tortishuv sabab sodir bo‘lgan.

Shundan so‘ng fuqarolar shu yerdagi go‘zallik saloniga kirib, buyumlarni sindirib janjal ko‘targan. Mast erkak xonada qolib ketgan ayolni tutib olib, ayovsiz do‘pposlagan.

Zarbalardan hushini yo‘qotgan ayol shifoxonaga olib borilgan.

“Derazalarni sindirib, ichkariga 3 yigit kirib keldi. Bizni quvib chiqarib yubordi. Opamizni kosmetolog xonasiga olib borib, vahshiylarcha kaltakladi.

Keyinroq 7—8 nafar erkak kelib, yana katta janjal bo‘lib ketdi”, — deydi guvohlardan biri.

Janjal, taxminan, 1 soatlar davom etgan.

Mazkur holat yuzasidan Jomboy tumani IIB huzuridagi tergov bo‘limi tomonidan jinoyat ishi qo‘zg‘atilgan.

Bundan avval Urganchda Malibu haydovchisi YPX xodimlarining qonuniy talabiga bo‘ysunmay, ular bilan janjallashgani, Samarqandda mast holatda begona qizga shilqimlik qilgan erkak 15 sutkaga qamalgani hamda Chirchiqda 5 yoshli bola 2 yoshli bolani yiqitib yuborgani uchun bolalarning onalari va buvilari o‘zaro janjallashgani haqida xabar berilgandi.