Toshkent viloyatining Oqqo‘rg‘on tumanidagi bog‘chada 12-avgust kuni 25 nafar bola zaharlanib, shifoxonaga yotqizilgandi. 13-avgust kuni tibbiyot muassasalariga yotqizilgan tarbiyalanuvchilar soni 30 nafarga yetgandi. Maktabgacha ta’lim vazirligi ushbu bolalarning ahvoli haqida ma’lumot berdi.
Qayd etilishicha, 17-avgustga kelib, tibbiyot muassasalarida intoksikatsiya sindromi belgilari bilan jami 12 tarbiyalanuvchi davolanmoqda. Ulardan 3 nafarining holati o‘rta og‘ir, 8 nafar bemorning holati o‘rtacha baholanib, sog‘ayish arafasida, 1 nafar bolaning holati qoniqarli.
Xabarda ta’kidlanishicha, tarbiyalanuvchilarning salomatligi va o‘tkazilayotgan surishtiruv ishlari natijalari bo‘yicha qo‘shimcha ma’lumot berib boriladi.
Eslatib o‘tamiz, ushbu bog‘cha tarbiyalanuvchilari zaharlanganligi holati yuzasidan Jinoyat kodeksining 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) bilan jinoyat ishi qo‘zg‘atilgan. Tergov harakatlari olib borilmoqda.
Izoh (0)