Қашқадарё вилояти Қарши туманидаги савдо марказида маст фуқаролар жанжал келтириб чиқарди, дея хабар бермоқда вилоят ИИБ ахборот хизмати.
Маълум қилинишича, 2021 йил 14 август куни Қарши тумани ИИБ навбатчилик қисмига келиб тушган хабарга кўра, туман марказида жойлашган «Сим-Сим» савдо марказида, тахминан, соат 22:00 ларда мазкур туманда яшовчи О.Қ. ва шериги Х.Ё. билан бирга ўтириб овқатланиб, у ерда спиртли ичимлик истеъмол қилиб, «Сим-Сим» савдо марказидан, тахминан, соат 00:00 ларда ташқарига чиққан.
Улар савдо маркази олдида ўтирган фуқаролар А.Ф., Р.Р. ва И.Ж. билан ўзаро тортишиб қолган. О.Қ. жанжалда И.Ж.нинг юз қисмига ургач, ўртада жанжал юзага келиб, жанжалга Х.Ё. ҳам қўшилган.
Мазкур ҳолат Қарши тумани ИИБ навбатчилик қисмида қайд этилиб, терговга қадар суриштирув ҳаракатлари олиб борилиб, туман ИИБ ҳузуридаги ТБ томонидан фуқаролар О.Қ ва Х.Ё.га нисбатан Жиноят кодексининг 277-моддаси 2-қисми «б» банди (бир гуруҳ шахслар томонидан содир этилган безорилик) билан жиноят иши қўзғатилган.
Ҳозирда дастлабки тергов ҳаракатлари олиб борилмоқда.
Бундан аввал Самарқандда гўзаллик салонида ишлайдиган аёлни маст эркак аёвсиз калтаклагани, Нукусда кафе эгаси мижоз билан жанжаллашиб, уни ўлдириб қўйгани ҳамда Тошкентда қовун-тарвуз сотувчиси ва ИИБ ходимлари ўртасида жанжал акс этган видео юзасидан изоҳ берилгани ҳақида хабар берилганди.
Изоҳ (0)