Dunyodagi eng arzon smartfon deya nomlangan JioPhone Next’ning narxi va texnik tavsifiga oid ma’lumotlar paydo bo‘ldi. Hindistonning Reliance konglomerati 2021-yilning iyunida JioPhone Next smartfoni Google bilan hamkorlikda yaratilganini e’lon qilgandi, deb yozadi IXBT.
Nashr manbalarining ma’lum qilishicha, qurilma 47 dollar qiymatida sotuvga chiqadi. Reliance raisi Mukesh Ambani JioPhone Next nafaqat Hindistondagi, balki butun dunyodagi eng arzon smartfonga aylanishini ta’kidlagan.
Qurilma Qualcomm Snapdragon 215 mobil platformasi bilan jihozlangan bo‘lib, u Android 11 Go operatsion tizimida ishlaydi. Telefonga Duo Go va Google Camera Go dasturlarining yengillashtirilgan versiyalari o‘rnatilgan bo‘ladi. Ekran tiniqligi HD+ bo‘lib, smartfon ikkita SIM-karta slotiga ega bo‘ladi, 4G VoLTE, Wi-Fi va Bluetooth 4.2’ni qo‘llab-quvvatlaydi.
Smartfonning asosiy kamerasi 13 megapikselli OmniVIsion, frontal kamerasi — 8 megapikselli sensor bo‘lib, 1080r sifatda video tasvirga olishga qodir. Tezkor xotirasi esa 3 gigabaytni tashkil etadi. Mazkur smartfon 10-sentabrda sotuvga chiqishi kutilmoqda.
Avvalroq Nokia 105 va Nokia 110 — eng arzon tugmali telefonlar taqdim etilgani to‘g‘risida xabar berilgandi.
Izoh (0)