Xiaomi kompaniyasi smartfonlaridagi muammolar sabab foydalanuvchilaridan uzr so‘rab chiqdi. Bu haqda Xitoyning MyDrivers nashriga tayanib, Hi-Tech.Mail.ru xabar berdi.
Uzr Xiaomi MIUI bosh menejeri Jin Fan ishtirok etgan matbuot anjumanida yangragan. Uning so‘zlariga ko‘ra, kompaniya iste’molchilar oldida smartfonlar uchun chiqarilgan MIUI 12 operatsion tizimi ko‘plab nuqsonlarga egaligi va oxiriga qadar optimallashtirilmagani sabab aybdor.
Shu sababli Fan Xiaomi kompaniyasi MIUI 13 ni ertaroq taqdim etishdan bosh tortayotganini, chunki tizimni yaxshilab tekshirish kerakligini ma’lum qilgan. Korporatsiya top-menejeri, shuningdek, kompaniya mutaxassislari MIUI 12 dagi asosiy muammolarni qayd etganini va yangilangan MIUI 12.5 taqdim etilganini bildirgan.
Xiaomi ma’lumotlariga ko‘ra, MIUI 12.5 da tizim bilan bog‘liq jami 160 ta muammo va ichki dastur hamda servislarga aloqador 224 ta kamchilik bartaraf etilgan. MIUI 12.5 operatsion tizimiga ega bo‘ladigan dastlabki smartfonlar partiyasidan 12 model o‘rin oladi. Masalan, yaqinda taqdim etilgan Xiaomi Mi Mix 4, Mi 11 Ultra, Mi 10 va boshqa devayslar.
Xiaomi kompaniyasi so‘nggi bor brend ishqibozlaridan 2020-yilning fevralida uzr so‘rab chiqqandi. O‘shanda kompaniya Android’ning yangilangan versiyasi taqdimoti kechikkaniga izoh berib, muammo koronavirus infeksiyasi tarqalgani sabab yuzaga keltirganini tushuntirgan edi.
Izoh (0)