Xiaomi kompaniyasi xatolik sabab o‘zining blogiga Redmi 10 ga oid ma’lumotlarni rejalashtirilgan muddatidan oldin joylashtirib yubordi, deb xabar beradi Hi-Tech.Mail.ru.
Taxminlarga ko‘ra, Redmi 10 modeli 18-avgust kuni taqdim etiladi va shu kunda smartfonga oid barcha ma’lumotlar oshkor qilinadi.
Xiaomi tomonidan e’lon qilingan ma’lumotlarda keltirilishicha, Redmi 10 smartfoni FHD+ sifatni qo‘llab-quvvatlaydigan va 90 gertsli yangilanish chastotasiga ega 6,5 dyuymli displeyga ega bo‘ladi. Bu smartfon ekrandagi kontentdan kelib chiqib tasvirning yangilanish chastotasini avtomatik ravishda o‘zgartirishidan dalolat beradi.
Smartfon sig‘imi 5000 mA/soatga teng akkumulyator bilan jihozlangan va u 18 vattli tezkor quvvatlanish funksiyasiga ega. Manbalarning ta’kidlashicha, Redmi 10 modeli 22,5 vattli quvvatlantirgich bilan yetkazib beriladi.
Qurilma ichidan MediaTek’ning bir kristalli Helio G88 protsessori, 6 gigabayt tezkor va 128 gigabayt ichki xotirasi o‘rin olgan. To‘rttalik kamera smartfonning orqa tomonini bezab turadi ular orasidan 60 megapikselli asosiy datchik, 8 megapikselli keng burchakli, shuningdek, makro suratga olish va chuqurlikni o‘lchovchi 2 megapikselli datchiklar o‘rin olgan. Frontal kamerasi 8 megapiksel bo‘lib, ekranda uning uchun kichik qirqim qoldirilgan.
Qurilmaning barmoq izi skaneri yon tomonga joylashtirilgan. Smartfon Android 11 bazasidagi MIUI 12.5 operatsion tizimida ishlaydi. Xiaomi e’lon qilmagan yagona ma’lumot — bu yangi telefonning narxi. U o‘zidan oldingi modellarga qaraganda haqiqatan premium ko‘rinishga ega bo‘lgan va Xiaomi e’lon qilmagan barcha ma’lumotlar shu haftada ma’lum bo‘ladi.
Bu kabi smartfonlarning bazaviy versiyalari narxi 185 dollardan boshlanadi.
Avvalroq Redmi kompaniyasi yangi Note 10 Pro versiyasi va AirDots 3 Pro naushnigini taqdim etgani to‘g‘risida xabar berilgandi.
Izoh (0)