Дунёдаги энг арзон смартфон дея номланган JioPhone Next’нинг нархи ва техник тавсифига оид маълумотлар пайдо бўлди. Ҳиндистоннинг Reliance конгломерати 2021 йилнинг июнида JioPhone Next смартфони Google билан ҳамкорликда яратилганини эълон қилганди, деб ёзади IXBT.
Нашр манбаларининг маълум қилишича, қурилма 47 доллар қийматида сотувга чиқади. Reliance раиси Мукеш Амбани JioPhone Next нафақат Ҳиндистондаги, балки бутун дунёдаги энг арзон смартфонга айланишини таъкидлаган.
Қурилма Qualcomm Snapdragon 215 мобил платформаси билан жиҳозланган бўлиб, у Android 11 Gо операцион тизимида ишлайди. Телефонга Duo Go ва Google Camera Go дастурларининг енгиллаштирилган версиялари ўрнатилган бўлади. Экран тиниқлиги HD+ бўлиб, смартфон иккита SIM-карта слотига эга бўлади, 4G VoLTE, Wi-Fi ва Bluetooth 4.2’ни қўллаб-қувватлайди.
Смартфоннинг асосий камераси 13 мегапикселли OmniVIsion, фронтал камераси — 8 мегапикселли сенсор бўлиб, 1080р сифатда видео тасвирга олишга қодир. Тезкор хотираси эса 3 гигабайтни ташкил этади. Мазкур смартфон 10 сентябрда сотувга чиқиши кутилмоқда.
Аввалроқ Nokia 105 ва Nokia 110 — энг арзон тугмали телефонлар тақдим этилгани тўғрисида хабар берилганди.
Изоҳ (0)