Samsung buklanuvchan ekranga ega ikkita yangi smartfon — Galaxy Z Fold3 5G va Galaxy Z Flip3 5G’ni taqdim etdi, deb xabar beradi Esquire.
Z Flip3 — bu “raskladushka” turiga kiruvchi telefon. Yangi model qo‘ldan foydalanmagan holda selfi qilish hamda o‘chirib-yoqish tugmasini ikki marta bosish orqali murakkab vaziyatlarda foto hamda videolarni tasvirga olish imkonini beradi. Kompaniyadagilarning ta’kidlashicha, smartfon YouTube’da roliklar yoki TV-shoularni ko‘rishga juda qulay.
Z Fold3 ochilgan holatda kitobchani yodga soladi. Qurilma 7,6 dyuymli Infinity Flex ekran va S Pen stilusiga ega bo‘lgan. Samsung vakillarining ta’kidlashicha, smartfon displeyi kamroq energiya iste’mol qilgan holda 29 foizga yorqinlashgan.
Ikkala smartfon ham besh yil davomida standart foydalanish orqali 200 ming marta buklanishga bardoshli. Z Fold3 modeli sig‘imi 4400 mA/soat, Z Flip3 esa 3300 mA/soat akkumulyator bilan jihozlangan.
Shuningdek, ishlab chiqaruvchi “aqlli” soatlarning ikkita modelini taqdim etadi — Galaxy Watch4 va Galaxy Watch4 Classic. Ularning narxi 272 dollardan boshlanadi. Qolgan yangiliklar qatoridan faol shovqin so‘ndirish funksiyasiga ega to‘liq simsiz Galaxy Buds2 garniturasi o‘rin olgan — 150 dollar.
Samsung hozirda yangi qurilmalar uchun oldindan buyurtmalar qabul qilishni boshlagan, ular 10-sentabr kuni sotuvga chiqadi. Galaxy Z Fold3 5G narxi (256 GB) 2180 dollardan, Galaxy Z Flip3 esa (128 GB) 1225 dollardan boshlanadi.
Avvalroq Samsung’ning buklanuvchan “garmoshka-planshet”i yangi tasvirlarda namoyish etilgandi.
Izoh (0)