Kam Air aviakompaniyasining 17-avgust kuni Kobul—Toshkent—Kobul yo‘nalishi bo‘yicha uchishi kerak bo‘lgan RQ-907/RQ-908 reysi amalga oshirilmadi. Bu haqda Telegram’dagi “Novosti Tashkentskogo neba” kanali xabar berdi.
Ma’lum qilinishicha, parvoz Kobul aeroporti va Afg‘oniston havo makonining tijoriy aviareyslar uchun yopilgani sabab bekor qilingan.
Ta’kidlash kerakki, afg‘on kompaniyasining reyslari haftaning har seshanba, payshanba va shanba kunlari amalga oshirilib kelgan. Parvoz davomiyligi 1 soat 40 daqiqa. Mazkur aviatashuvchining so‘nggi parvozi 14-avgust kuni Airbus A-340-300 havo layneri tomonidan amalga oshirilgan edi.
Avvalroq Uzbekistan Airways samolyotlari Afg‘oniston havo hududini chetlab uchishni boshlagani, Germaniyaning ikkinchi evakuatsiya samolyoti 125 nafar yo‘lovchi bilan Afg‘onistondan Toshkentga uchib kelgani to‘g‘risida xabar berilgandi.
Eslatib o‘tamiz, 15-avgust kuni “Tolibon” Afg‘onistonning butun hududini o‘z nazorati ostiga olganini e’lon qildi. 16-avgust kuni Afg‘oniston fuqaro aviatsiyasi aviakompaniyalarga mamlakat havo hududini aylanib o‘tishni tavsiya etdi. Shu kuniyoq United Airlines, British Airways va Virgin Atlantic aviakompaniyalari Afg‘oniston havo hududidan foydalanishni to‘xtatdi. 17-avgust kuni ular qatoriga Air France-KLM, Lufthansa, Qatar Airways, Singapore Airlines, China Airlines va boshqa aviakompaniyalar qo‘shildi.
Izoh (0)