Kam Air авиакомпаниясининг 17 август куни Кобул—Тошкент—Кобул йўналиши бўйича учиши керак бўлган RQ-907/RQ-908 рейси амалга оширилмади. Бу ҳақда Telegram’даги «Новости Ташкентского неба» канали хабар берди.
Маълум қилинишича, парвоз Кобул аэропорти ва Афғонистон ҳаво маконининг тижорий авиарейслар учун ёпилгани сабаб бекор қилинган.
Таъкидлаш керакки, афғон компаниясининг рейслари ҳафтанинг ҳар сешанба, пайшанба ва шанба кунлари амалга оширилиб келган. Парвоз давомийлиги 1 соат 40 дақиқа. Мазкур авиаташувчининг сўнгги парвози 14 август куни Airbus А-340-300 ҳаво лайнери томонидан амалга оширилган эди.
Аввалроқ Uzbekistan Airways самолётлари Афғонистон ҳаво ҳудудини четлаб учишни бошлагани, Германиянинг иккинчи эвакуация самолёти 125 нафар йўловчи билан Афғонистондан Тошкентга учиб келгани тўғрисида хабар берилганди.
Эслатиб ўтамиз, 15 август куни «Толибон» Афғонистоннинг бутун ҳудудини ўз назорати остига олганини эълон қилди. 16 август куни Афғонистон фуқаро авиацияси авиакомпанияларга мамлакат ҳаво ҳудудини айланиб ўтишни тавсия этди. Шу куниёқ United Airlines, British Airways ва Virgin Atlantic авиакомпаниялари Афғонистон ҳаво ҳудудидан фойдаланишни тўхтатди. 17 август куни улар қаторига Air France-KLM, Lufthansa, Qatar Airways, Singapore Airlines, China Airlines ва бошқа авиакомпаниялар қўшилди.
Изоҳ (0)