Aviakompaniyalar Afg‘oniston havo hududini chetlab o‘tish maqsadida o‘z yo‘nalishlarini o‘zgartirmoqda. Bunday kompaniyalar qatoriga United Airlines (UAL.O), British Airways va Virgin Atlantic kiradi. Aksariyat reyslar o‘z yo‘nalishini Pokiston va Eron havo maydoniga o‘zgartirgan.

Foto: Getty Images

Reuters ta’kidlashicha, aviakompaniyalar va hukumatlar “yer-havo” raketalari bilan bog‘liq ikkita halokatli hodisada — Donesk yaqinida Malayziyaning MH-17 samolyotining urib tushirilishi va Tehron yaqinida Ukraina xalqaro havo yo‘llari samolyotining qulatilishidan keyin ziddiyatli zonalar ustidan uchish xavfiga ko‘proq e’tibor qarata boshlagan.

Germaniyaning Lufthansa aviakonserni va unga kiruvchi barcha kompaniyalar Afg‘oniston osmonidan o‘tuvchi parvozlarni to‘xtatdi. Lufthansa Group tarkibiga Germaniyaning Eurowings, Shveysariyaning Swiss, Avstriyaning Austrian Airlines va Bryusselning Brussels Airlines aviakompaniyalari kiradi.

Afg‘oniston fuqaro aviatsiyasi boshqarmasi (ACAA)ning ma’lum qilishicha, Kobul havo maydoni harbiylar uchun ochiq, tranzit samolyotlarga uni aylanib o‘tish tavsiya etiladi.

ACAA, shuningdek, fuqarolik reyslarini to‘xtatdi hamda “talonchilik va tartibsizliklarning oldini olish uchun“ fuqarolardan Kobul aeroportiga kelmaslikni so‘radi.

Kobul aeroportida tartibsizliklar boshlangan. “Tolibon” barcha chegara punktlarini egallab olgan, Afg‘onistonni faqat samolyot orqali tark etish mumkin. Aeroport odamlarga to‘lgan. AFP xabariga ko‘ra, olomon uchish-qo‘nish yo‘lagiga bostirib kirgan, natijada AQSh harbiylari havoga ogohlantiruvchi o‘t ochishni boshlagan.

AQSh rasmiy vakilining Reutersga izoh berishicha, olomon nazoratdan chiqib ketgach, tartibsizlikka qarshi kurashish uchun otishma boshlangan.

“RIA Novosti” ning xavfsizlik xizmatidagi manbasiga ko‘ra, Kobul aeroportida allaqachon bir necha kishi halok bo‘lgan.

Eslatib o‘tamiz, 15-avgust kuni “Tolibon” Afg‘onistonning butun hududini o‘z nazorati ostiga olganini e’lon qildi. Shu kuni “Tolibon” Kobuldagi prezident saroyiga kirdi. Keyinroq hukumat kuchlari tark etgan barcha davlat muassasalarini va davlat televideniyesini egallab oldi.

Afg‘oniston prezidenti Ashraf G‘ani iste’fo berishga rozi bo‘lgan va mamlakatni tark etgan. The New York Times va Al Jazeera Ashraf G‘anining O‘zbekistonga yo‘l olgani haqida xabar berdi. Ammo keyinroq Ashraf G‘ani O‘zbekistonda ham, Tojikistonda ham, Qozog‘istonda ham emasligi ma’lum qilindi.

“Afg‘onistonda urush tugadi”, — deya e’lon qildi “Tolibon” harakati rasmiy vakili Muhammad Naim Al-Jazeera telekanali efirida.