TIV O‘zbekistonga kelgan turistda koronavirus aniqlansa, u o‘z yurtiga qaytarilishini ma’lum qildi

Tashqi ishlar vazirligi koronavirus pandemiyasi davrida xorijiy davlatlar hududidan O‘zbekistonga tashrif buyurish bo‘yicha tartiblar to‘g‘risida ma’lumot berdi.

Unga ko‘ra, havo va temiryo‘l orqali tashrif buyurayotgan shaxslar O‘zbekistonga kelish uchun havo yoki temiryo‘l qatnoviga ro‘yxatdan o‘tishdan oldin so‘nggi 72 soatdan ko‘p bo‘lmagan muddatda koronavirus infeksiyasiga faqat PZR (polimeraza zanjirli reaksiya) orqali tekshirilib, manfiy ko‘rsatkichga ega deb topilgan ma’lumotnomani taqdim qiladi.

PZR test o‘tkazish orqali koronavirus infeksiyasi mavjudligini tekshirish huquqiga ega laboratoriyalar va tibbiyot muassasalari ro‘yxatini quyidagi havola orqali ko‘rish mumkin.

O‘zbekistonga avtoyo‘l chegara o‘tkazish punktlari orqali kirib kelayotgan shaxslar tomonidan o‘z mablag‘lari hisobidan chegara o‘tkazish punktlarida faoliyat yuritadigan maxsus klinika yoki laboratoriyalarda koronavirus infeksiyasi antigenini ekspress test tekshiruvi orqali manfiy natija qayd etilgan ma’lumotnoma taqdim etilgan taqdirda mamlakat hududiga kiritiladi.

Shuningdek, “sariq” va “qizil” toifaga ajratilgan davlatlardan kirib kelayotgan shaxslar O‘zbekiston hududiga kirishda majburiyatnoma to‘ldirgan holda, 14 kunga yashash joyi bo‘yicha yoki mehmonxonada uy karantinini o‘tashlari talab etiladi.

TIV qayd etishiga ko‘ra, O‘zbekistonga turist sifatida kelayotgan chet el fuqarolari va mamlakatda doimiy istiqomat qilmaydigan fuqaroligi bo‘lmagan shaxslarni taklif qilgan turoperator tomonidan DXX Chegara qo‘shinlari va Davlat bojxona qo‘mitasi vakillariga zarurat bo‘lganda turizm xizmati ko‘rsatilayotgan shaxslar va turizm xizmatini ko‘rsatish shartnomasi to‘g‘risidagi ma’lumotlar ko‘rsatilgan vaucher taqdim qilinadi.

Davlat chegaralari o‘tish punktlarida, xalqaro aeroport hamda vokzallardan O‘zbekistonga “sariq” va “qizil” davlatlardan turoperator yoki turagent xizmatlaridan foydalanmagan holda mustaqil tashrif buyurayotgan turistlar umumiy tartibda kirib kelishi belgilangan.

O‘zbekistonga kirish vaqtida turist tomonidan koronavirus infeksiyasining mavjud alomatlari tufayli topshirilgan test natijalari musbat chiqqanda, o‘z mamlakatiga qaytib ketish masalasi shu kundagi muayyan aviakompaniya yoki boshqa transport kompaniyalarining yo‘lovchilarni tashish tartibiga muvofiq amalga oshiriladi.