“Tolibon” Kobul aholisiga zarar yetkazayotgani yo‘q, lekin shaharliklar baribir zaruratsiz ko‘chaga chiqmasdan, vaziyat hal bo‘lguncha uyda qolishni afzal ko‘rmoqda. Bu haqda mahalliy aholi “RBK”ga gapirib berdi.
“Tolibon’ Afg‘onistonga bostirib kirdi, lekin hozircha hech kimga zarar yetkazmadi. Hozircha hammasi tinch. Hayot deyarli o‘zgarmagan. Ular hech kimni o‘ldirishni istamaydi”, — deydi asli Mozori Sharifdan bo‘lgan “RUDN” (Rossiya Xalqlar do‘stligi universiteti) talabasi Ahmad Sanor Nakibi. Uning qo‘shimcha qilishicha, “Tolibon” harbiylar va politsiyani “afv etgan”.
Biroq Nakibining so‘zlariga ko‘ra, Kobul aholisi qattiq qo‘rquvda, ular AQShga ketmoqchi. “Nega ular ketishni xohlayapti, bilmayman. ‘Tolibon’ bizni o‘ldirmoqchi emas, lekin endi odamlar erkinligidan mahrum bo‘ldi ”, — deya qo‘shimcha qildi u.
Kobulda yashovchi Mudaserning aytishicha, 16-avgust, dushanba kuni poytaxtda hech kim shu jumladan politsiya ham ishga chiqmagan. “Tolibon’ politsiya sifatida ishlamoqda, shaharni talonchilardan himoya qilmoqda. Odamlar, ayniqsa, ayollar yuz berayotgan voqealardan qo‘rquvda”, — dedi u.Poytaxtning yana bir fuqarosi Nazir Eyxlassning so‘zlariga ko‘ra, odamlar qo‘rquvdan ham ko‘proq Afg‘oniston “Tolibon” qo‘liga qanchalik tez o‘tganidan hayratda.
“Hech kim Afg‘oniston ikki hafta ichida qulashiga ishonmasdi. Bu yerdagi har bir afg‘on mamlakat ‘Tolibon’ga hech qanday kurashsiz topshirilganiga va bunda AQShning qo‘li borligiga ishonadi ”, — dedi u.
Eyxlassning aytishicha, kobulliklarning odatiy hayoti buzilgan: tashkilotlar ishlamayapti, yo‘llar bo‘m-bo‘sh, aholi esa jiddiy zaruratsiz uylaridan chiqmayapti. Uning ta’kidlashicha, chegaralar yopilgani sababli narx-navo oshgan, odamlar “Tolibon”dan narxlarni nazoratga olishini so‘ramoqda.
“Tolibon” vakilining xabariga ko‘ra, harakat Kobulning katta qismini nazoratga olgach, jangarilarga mahalliy aholini qo‘rqitmaslikni va ularning normal hayotga qaytishiga ruxsat berishni buyurgan. “Tolibon”, shuningdek, o‘z kuchlari shaharga talon-torojlarning oldini olish uchun kirib kelayotganini ochiqchasiga da’vo qilgan. Jangarilarga kimnidir bezovta qilish yoki qo‘rqitish taqiqlangan.
Harakat, shuningdek, “Tolibon” davrida jamiyat qanday ishlashi haqida ba’zi tafsilotlarni oshkor qildi. Xususan, ayollarning ishlashi va ta’lim olishiga, shuningdek, erkaklar hamrohligisiz uydan yolg‘iz chiqishiga ruxsat berish rejalashtirilgan. Shu bilan birga, barcha ayollar hijob kiyishi shart.Jamiyatda o‘zboshimchalik bilan jazolash taqiqlanadi, qatl qilish yoki toshbo‘ron qilish kabi jazolar faqat sud qarori bilan amalga oshiriladi. Bundan tashqari, “Tolibon” ommaviy axborot vositalariga bo‘layotgan voqealarni tanqid qilishga ruxsat berishni rejalashtirmoqda.
Avvalroq Afg‘oniston maxsus kuchlari tarqatib yuborilgani, aholidan qurol-yarog‘lar musodara qilinayotgani haqida xabar berilgandi.
Izoh (0)