«Толибон» Кобул аҳолисига зарар етказаётгани йўқ, лекин шаҳарликлар барибир заруратсиз кўчага чиқмасдан, вазият ҳал бўлгунча уйда қолишни афзал кўрмоқда. Бу ҳақда маҳаллий аҳоли «РБК»га гапириб берди.
«Толибон’ Афғонистонга бостириб кирди, лекин ҳозирча ҳеч кимга зарар етказмади. Ҳозирча ҳаммаси тинч. Ҳаёт деярли ўзгармаган. Улар ҳеч кимни ўлдиришни истамайди», — дейди асли Мозори Шарифдан бўлган «РУДН» (Россия Халқлар дўстлиги университети) талабаси Аҳмад Санор Накиби. Унинг қўшимча қилишича, «Толибон» ҳарбийлар ва полицияни «афв этган».
Бироқ Накибининг сўзларига кўра, Кобул аҳолиси қаттиқ қўрқувда, улар АҚШга кетмоқчи. «Нега улар кетишни хоҳлаяпти, билмайман. ‘Толибон’ бизни ўлдирмоқчи эмас, лекин энди одамлар эркинлигидан маҳрум бўлди », — дея қўшимча қилди у.
Кобулда яшовчи Мудасернинг айтишича, 16 август, душанба куни пойтахтда ҳеч ким шу жумладан полиция ҳам ишга чиқмаган. «Толибон’ полиция сифатида ишламоқда, шаҳарни талончилардан ҳимоя қилмоқда. Одамлар, айниқса, аёллар юз бераётган воқеалардан қўрқувда», — деди у.Пойтахтнинг яна бир фуқароси Назир Эйхласснинг сўзларига кўра, одамлар қўрқувдан ҳам кўпроқ Афғонистон «Толибон» қўлига қанчалик тез ўтганидан ҳайратда.
«Ҳеч ким Афғонистон икки ҳафта ичида қулашига ишонмасди. Бу ердаги ҳар бир афғон мамлакат ‘Толибонъга ҳеч қандай курашсиз топширилганига ва бунда АҚШнинг қўли борлигига ишонади », — деди у.
Эйхласснинг айтишича, кобулликларнинг одатий ҳаёти бузилган: ташкилотлар ишламаяпти, йўллар бўм-бўш, аҳоли эса жиддий заруратсиз уйларидан чиқмаяпти. Унинг таъкидлашича, чегаралар ёпилгани сабабли нарх-наво ошган, одамлар «Толибон»дан нархларни назоратга олишини сўрамоқда.
«Толибон» вакилининг хабарига кўра, ҳаракат Кобулнинг катта қисмини назоратга олгач, жангариларга маҳаллий аҳолини қўрқитмасликни ва уларнинг нормал ҳаётга қайтишига рухсат беришни буюрган. «Толибон», шунингдек, ўз кучлари шаҳарга талон-торожларнинг олдини олиш учун кириб келаётганини очиқчасига даъво қилган. Жангариларга кимнидир безовта қилиш ёки қўрқитиш тақиқланган.
Ҳаракат, шунингдек, «Толибон» даврида жамият қандай ишлаши ҳақида баъзи тафсилотларни ошкор қилди. Хусусан, аёлларнинг ишлаши ва таълим олишига, шунингдек, эркаклар ҳамроҳлигисиз уйдан ёлғиз чиқишига рухсат бериш режалаштирилган. Шу билан бирга, барча аёллар ҳижоб кийиши шарт.Жамиятда ўзбошимчалик билан жазолаш тақиқланади, қатл қилиш ёки тошбўрон қилиш каби жазолар фақат суд қарори билан амалга оширилади. Бундан ташқари, «Толибон» оммавий ахборот воситаларига бўлаётган воқеаларни танқид қилишга рухсат беришни режалаштирмоқда.
Аввалроқ Афғонистон махсус кучлари тарқатиб юборилгани, аҳолидан қурол-яроғлар мусодара қилинаётгани ҳақида хабар берилганди.
Изоҳ (0)