Аndijon viloyatining Xo‘jaobod tuman hokimi birinchi o‘rinbosari Ikrom Teshaboyev 41 yoshida yurak xuruji va pnevmoniyadan vafot etdi, deya xabar bermoqda “Daryo” muxbiri.
Ikrom Teshaboyev 1980-yilda Xo‘jaobod tumanida tug‘ilgan bo‘lib, 2008-yili Аndijon muhandislik-iqtisodiyot institutini sirtdan tamomlagan. Turli yillarda Xo‘jaobod tumanidagi shirkat va fermer xo‘jaliklari hisobchisi, 2008—2019-yillarda tuman statistika bo‘limi boshlig‘i, tuman hokimligi hududlarni kompleks rivojlantirish yig‘ma bo‘limi mutaxassisi, iqtisodiyot va sanoat bo‘limi boshlig‘i, 2019—2020-yillarda Xo‘jaobod tumani hokimining iqtisodiyot va tadbirkorlik masalalari bo‘yicha birinchi o‘rinbosari lavozimida ishlagan.
U 2020-yildan buyon Xo‘jaobod tumani hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — tuman iqtisodiy taraqqiyot va kambag‘allikni qisqartirish bo‘limi boshlig‘i lavozimida mehnat qilib kelayotgan edi.
Eslatib o‘tamiz, 2020-yil 29-sentabrida Andijon viloyati Xonobod shahri hokimi Musaxon Mamadaliyev o‘tkir yurak-qon tomir yetishmovchiligi kasalligidan, 7-oktabr kuni viloyatning Oltinko‘l tumani hokimi Nazirjon O‘rinboyev pnevmoniya kasalligi asoratlari va o‘tkir yurak-qon tomir yetishmovchiligidan vafot etgan edi. Bundan tashqari, 2017-yil oktabrida viloyatning Ulug‘nor tumani hokimi Asilbek Yusupov miyaga qon quyilishi oqibatida, 31-iyul kuni esa 2020-yilning 4-martidan buyon Bo‘ston tumani hokimi vazifasida ishlab kelayotgan Sadbarxon Mamitovaning og‘ir xastalikdan, Andijon tumaniga 13 yil hokimlik qilgan Hasanboy Hakimov pnevmoniyadan vafot etgani xabar berilgandi.
Izoh (0)