“Buyuk ipak yo‘li” metro bekati yaqinidagi yerosti yo‘lagi shiftining bir qismi qulab tushdi

Toshkent shahar Mirzo Ulug‘bek tumani “Buyuk ipak yo‘li” metro bekati yaqinidagi yerosti yo‘lagi shiftining bir qismi qulab tushdi, deya xabar bermoqda Favqulodda vaziyatlar vazirligi.

Ma’lum qilinishicha, soat 14:30 da “Buyuk ipak yo‘li” metro bekati yaqinidagi yerosti o‘tish joylaridan birida kompozit panellardan (alyukobond) yasalgan shiftning bir qismi qulab tushgan.

Hodisa oqibatida jarohat olganlar va vafot etganlar yo‘q.

Aniqlanishicha, strukturaning bir qismi yerosti o‘tish joyining tepasida joylashgan maysazorni sug‘orish natijasida to‘plangan suvning og‘irligi fonida qulab tushgan.

Voqea sabab yetkazilgan zarar katta bo‘lmagan. Hudud bir necha daqiqa ichida bo‘laklardan tozalangan.

Avvalroq ushbu yerosti yo‘lagi tepasidan suv oqishi holati kuzatilgani haqida xabar berilgandi. Xabarda “Toshkent metropoliteni” bu mazkur yerosti o‘tish yo‘lagi “Toshkent metropoliteni” tasarrufiga emas, balki Mirzo Ulug‘bek tumani hokimligiga qarashli ekani ma’lum qilgandi.