O‘zbekistonda, ayrim istisno holatlarni inobatga olmasa, katta hududiy birliklarning bari hokimlar tomonidan boshqariladi. 2021-yilning iyul oyida ana shunday hududlarga rahbarlik qiluvchi ikki kishi — Toshkentdagi Olmazor tumani va Andijondagi Bo‘ston tumani hokimlari vafot etdi. Koronavirus infeksiyasining tarqalishi O‘zbekistonda iyul oyida o‘zining ayni cho‘qqisiga chiqqaniga qaramay, ushbu ikki amaldorning o‘limiga mazkur kasallik sababchi emasligi ta’kidlanadi. E’tiborga molik tomoni, roppa-rosa bir yil oldin, koronavirus aynan cho‘qqiga ko‘tarilgan vaqtda, O‘zbekistondagi bir necha hudud rahbarlari — ular orasida viloyat hokimlari ham bor — COVID-19 qurboniga aylangan edi.

“Daryo” so‘nggi yillarda hokim (yoki hudud rahbari) lavozimi egasi sifatida vafot etgan o‘zbek amaldorlarini bir sahifaga jamladi.

Andijon viloyati Ulug‘nor tumani hokimi lavozimiga tayinlanganiga salkam yetti yarim oy bo‘lgan Asilbek Yusupov 2017-yil 3-oktabr kuni miyaga qon quyilishi (insult) tashxisi bilan kasalxonaga yotqizilgan, oradan ikki kun o‘tib, o‘ziga kelmay vafot etgan. U 57 yoshda edi. Tasdiqlanmagan ma’lumotlarga ko‘ra, u paxta yig‘im-terimiga bag‘ishlangan yig‘ilishda haqorat eshitganidan so‘ng ahvoli yomonlashib, hushidan ketgan.

Foto: “Kun.uz”

2019-yildan Qoraqalpog‘istonning Qonliko‘l tumaniga hokimlik qilgan Daulet To‘libayev kasalxonaga yotqizilganidan ikki hafta o‘tgach, 2020-yilning 24-iyul kuni koronavirus infeksiyasi asoratlari oqibatida vafot etgan edi. 37 yoshli bu yigit pandemiya davrida aynan COVID-19 asoratlari oqibatida vafot etgan O‘zbekistondagi birinchi hokim hisoblanadi.

Foto: O‘zA

Qoraqalpog‘iston Jo‘qorg‘i Kengesi raisi mavqeyi jihatdan O‘zbekistonning qolgan eng yirik hududiy birliklari rahbarlari — viloyat hokimlariga teng. 2020-yil 31-iyulga qadar ushbu lavozim egasi Musa Yerniyazov edi — 72 yoshli amaldor aynan shu sanada koronavirus infeksiyasi asoratlari oqibatida vafot etgan. Shuni qayd etish o‘rinliki, Qoraqalpog‘istonga 18 yil rahbarlik qilgan Yerniyazovning COVID-19 ga chalinib, davolanishda ekani salkam 20 kun jamoatchilikdan yashirilgan edi.

Foto: “Daryo” / Madina Nurman

Bosh vazir o‘rinbosarligiga ko‘tarilgan O‘ktam Barnoyev o‘rniga Buxoro viloyati hokimi etib tayinlangan Karim Kamolov bu lavozimda to‘liqsiz olti oy ishladi — u 2020-yil 22-avgust kuni 65 yoshida koronavirus infeksiyasi asoratlari oqibatida vafot etdi. Qayd etish joiz, oradan bir oy o‘tar-o‘tmas O‘ktam Barnoyev ham koronavirus qurboniga aylangan edi.

Foto: “Daryo” / Madina Nurman

2020-yil 4-mart kuni Qashqadaryoning Mirishkor tumani hokimi etib tayinlangan G‘ayrat Begaliyev oradan yarim yil o‘tib, 8-sentabr kuni koronavirus infeksiyasi asoratlari oqibatida vafot etdi. Sog‘liqni saqlash vazirligi ma’lumotlariga ko‘ra, hokimda ikki tomonlama pnevmoniya, o‘tkir yurak va nafas yetishmovchiligi, yurak ishemik kasalligi qayd etilgan. Ta’kidlash o‘rinli, hokim Begaliyevning o‘limidan ikki kun avval uning o‘rinbosari Mansur Rahimov ham COVID-19 dan vafot etgan edi.

Foto: Qashqadaryo viloyati hokimligi

2020-yilning sentabr oyi o‘rtalarida Andijon viloyatidagi to‘rtta hokim pnevmoniyadan davolanayotgani haqida xabarlar tarqaldi, ammo, afsuski, ularning hammasiga ham sog‘ayib ketish nasib etmadi. 29-sentabr kuni Xonobod shahri hokimi Musaxon Mamadaliyev o‘tkir yurak-qon tomir yetishmovchiligi kasalligidan vafot etgan; shifokorlar o‘shanda 49 yoshli hokimda koronavirus alomatlari topilmaganini alohida qayd etib o‘tgan edi.

Foto: Andijon viloyati hokimligi

Pnevmoniyadan davolanayotgani aytilgan andijonlik to‘rt hokim orasida, jumladan, 54 yoshli Nazirjon O‘rinboyev ham bor edi. U Oltinko‘l tumani hokimi etib tayinlanganiga ikki yil to‘lishiga 13 kun qolganida — 2020-yil 7-oktabr kuni pnevmoniya kasalligi asoratlari va o‘tkir yurak qon-tomir yetishmovchiligidan vafot etgan.

Foto: Andijon viloyati hokimligi

2017-yildan buyon Kattaqo‘rg‘on tumani hokimi lavozimida ishlab kelgan A’zamxon Bahromov 2020-yil 19-oktabr kuni 60 yoshida vafot etdi. Uning vafotidan so‘ng Kattaqo‘rg‘on tumani yetarlicha uzoq muddat hokimga yolchimadi, ayni vaqtda Samarqand shahridagi ko‘chalardan biriga uning nomi berilishi ma’lum qilindi. Bahromovning o‘limi sabablari ma’lum qilinmagan.

Foto: Kattaqo‘rg‘on tumani hokimligi

O‘zbekiston Markaziy banki sobiq raisi Fayzulla Mullajonovning o‘g‘li Abdumajid Mullajonov 2021-yil 18-iyul kuni miokard infarkti sababli vafot etdi. U 2021-yil yanvarida Toshkent shahrining Olmazor tumaniga hokimi etib tayinlangan edi. 51 yoshli podpolkovnik tumanni besh yarim oy boshqardi.

Foto: Toshkent shahar hokimligi

2020-yili 8-mart bayrami arafasida hokimlik lavozimlariga tayinlangan olti ayoldan biri — Andijon viloyati Bo‘ston (sobiq Bo‘z) tumani hokimi Sadbarxon Mamitova 2021-yil 31-iyul kuni vafot etdi. Ma’lumotlarga ko‘ra, u bir necha yil avval noto‘g‘ri o‘tkazilgan jarrohlik amaliyoti oqibatida yuz bergan ichak chirishi xastaligi oqibatida vafot etgan. 54 yoshli Sadbarxon Mamitova tuman hokimi lavozimini 2020-yil 4-martdan to umrining oxirigacha — salkam 17 oy egalladi.

Foto: Andijon viloyati hokimligi