Андижон вилоятининг Хўжаобод туман ҳокими биринчи ўринбосари Икром Тешабоев 41 ёшида юрак хуружи ва пневмониядан вафот этди, дея хабар бермоқда «Дарё» мухбири.
Икром Тешабоев 1980 йилда Хўжаобод туманида туғилган бўлиб, 2008 йили Андижон муҳандислик-иқтисодиёт институтини сиртдан тамомлаган. Турли йилларда Хўжаобод туманидаги ширкат ва фермер хўжаликлари ҳисобчиси, 2008—2019 йилларда туман статистика бўлими бошлиғи, туман ҳокимлиги ҳудудларни комплекс ривожлантириш йиғма бўлими мутахассиси, иқтисодиёт ва саноат бўлими бошлиғи, 2019—2020 йилларда Хўжаобод тумани ҳокимининг иқтисодиёт ва тадбиркорлик масалалари бўйича биринчи ўринбосари лавозимида ишлаган.
У 2020 йилдан буён Хўжаобод тумани ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — туман иқтисодий тараққиёт ва камбағалликни қисқартириш бўлими бошлиғи лавозимида меҳнат қилиб келаётган эди.
Эслатиб ўтамиз, 2020 йил 29 сентябрида Андижон вилояти Хонобод шаҳри ҳокими Мусахон Мамадалиев ўткир юрак-қон томир етишмовчилиги касаллигидан, 7 октябрь куни вилоятнинг Олтинкўл тумани ҳокими Назиржон Ўринбоев пневмония касаллиги асоратлари ва ўткир юрак-қон томир етишмовчилигидан вафот этган эди. Бундан ташқари, 2017 йил октябрида вилоятнинг Улуғнор тумани ҳокими Асилбек Юсупов мияга қон қуйилиши оқибатида, 31 июль куни эса 2020 йилнинг 4 мартидан буён Бўстон тумани ҳокими вазифасида ишлаб келаётган Садбархон Мамитованинг оғир хасталикдан, Андижон туманига 13 йил ҳокимлик қилган Ҳасанбой Ҳакимов пневмониядан вафот этгани хабар берилганди.
Изоҳ (0)