Mimar Group ва Тошкент шаҳридаги Ёджу техника институти ўртасида ҳамкорлик тўғрисидаги меморандум имзоланди

Имзоланган меморандум доирасида кадрларни тайёрлаш ва ёш мутахассисларнинг салоҳиятини ривожлантириш соҳаларида икки томонлама ҳамкорлик амалга оширилади.

Mimar Group қурилиш компанияси ва Тошкент шаҳридаги Ёджу техника институти ўртасида архитектура ва қурилиш соҳаларидаги кадрларни тайёрлаш ҳамда касбий ривожланишларда қўллаб-қувватлашга йўналтирилган ҳамкорлик меморандуми имзоланди.

10 август куни бўлиб ўтган мазкур тадбирда Mimar Group компанияси директори Ферузбек Давронов, Тошкент шаҳридаги Ёджу техника институти ректори Жанполат Кудайбергенов ҳамда компаниянинг HR департаменти ходимлари ва таълим муассасасининг профессор ўқитувчилари иштирок этишди.

Учрашувда Mimar Group компаниясининг маҳаллий ва чет эллик мутахассислар иштирокида воркшопларни ўтказиш, талабаларнинг диплом лойиҳаларини тайёрлашда кўмаклашиш ҳамда компаниянинг қурилиш объектларида малакавий амалиёт жараёнини ташкил этишга келишилди. Шунингдек, Mimar Group ходимлари учун Ёджу институтида таълим олиш имкониятлари муҳокама қилинди.

«Ёджу институти билан ёш мутахассисларни тайёрлаш, илмий-амалий тадқиқотларни ўтказиш ва бошқа соҳаларда ўзаро ҳамкорликни кенгайтиришдан манфаатдормиз. Mimar Group архитектура, қурилиш инжиниринги, шаҳарсозлик ва дизайн каби соҳаларда таълим муассасалари билан илм, тажриба алмашиш муҳитни яратишга интилмоқда. Ишончим комилки, Mimar Group ва Тошкент шаҳридаги Ёджу институти ўртасидаги ҳамкорлик кадрларни тайёрлаш тизимини юқори босқичга кўтаришга хизмат қилади», — деди Ферузбек Давронов.

Ўз навбатида, Жанполат Кудайбергенов Mimar Group компаниясига ҳамкорлик учун миннатдорчилик билдириб, институт талабалари учун касбий ривожланиш истиқболлари ҳамда ишга жойлашиш имкониятлари очилаётганини таъкидлади. Ёджу техника институти ректори Mimar Group ёш мутахассисларнинг илмий ҳамда илмий-амалий фаолиятига кўмаклашади, деб ишонч билдирди.

Ўз кадрлар стратегияси доирасида Mimar Group салоҳиятли ёш мутахассисларни излаб топиш, уларнинг назарий билимларини амалиётда мустаҳкамлаш ҳамда касбий ва шахсий ўсишларига имконият яратиш орқали малакали, етук кадрларни шакллантиришга катта эътибор қаратмоқда.

Аввалроқ хабар қилинганидек, Mimar Group компанияси Тошкент шаҳридаги Аджу университети ҳамда Тошкент архитектура-қурилиш институти билан ҳам ҳамкорлик меморандумларини имзолади.

Реклама ҳуқуқи асосида.