Mobil qurilmani xarid qilib olgandan so‘ng uning IMEI kodlari bilan bog‘liq muammolar yuzaga kelishi holatlarini oldini olish, xaridorga o‘z vaqtida tegishli ma’lumot berish uchun UzIMEI tizimining rasmiy veb-sayti, SMS yoki USSD so‘rovlar yordamida xarid qilinayotgan mobil qurilmaning IMEI kodini tekshirish bilan uning qanday yo‘l bilan ro‘yxatdan o‘tganligini aniqlash imkoniyati yaratildi. Sotib olingan mobil qurilma IMEI kodini tekshirganingizda ikki turdagi javobni olishingiz mumkin bo‘ladi.
Siz mobil qurilma sotib olishingizdan oldin uning IMEI kodini UzIMEI.uz rasmiy veb-sayti, SMS yoki USSD so‘rovlar yordamida tekshirganingizda quyidagi rasmda ko‘rsatilgan javob berilsa, ushbu mobil qurilmani sotib olish tavsiya etiladi. Ushbu mobil qurilma O‘zbekiston hududiga sotish uchun rasmiy olib kirilgan hisoblanadi.
Siz mobil qurilma sotib olishingizdan oldin uning IMEI kodini UzIMEI.uz rasmiy veb-sayti, SMS yoki USSD so‘rovlar yordamida tekshirganizda quyidagi rasmda ko‘rsatilgan javob berilsa, ushbu mobil qurilmani sotib olish tavsiya etilmaydi. Bu mobil qurilma jismoniy shaxsning pasport ma’lumotlari yordamida shaxsiy foydalanish uchun ro‘yxatdan o‘tkazilgan hamda pasport egasining murojaatiga asosan tizimdan o‘chirilishi mumkin.
Tizim operatori sizning mobil qurilmangizni ro‘yxatdan o‘tkazishni tavsiya qiladigan rasmiy xizmat ko‘rsatish punktlar haqida batafsilroq gaplashmoqchimiz.
Siz UzIMEI markaziy ofisida mobil qurilmangizni tekshirib ro‘yxatdan o‘tkazishingiz mumkin, bundan tashqari uyali aloqa operatorlari IMEI kodlarini ro‘yxatga olish ishlari UzMobile, Ucell, Mobiuz aloqa operatorlari tomonidan barcha rasmiy nuqtalarda, pochta bo‘limlarida hamda uzimei.uz sayti orqali ro‘yxatdan o‘tkazilmoqda.
Iste’molchilarga qulaylik yaratish maqsadida, hozirda Qoraqalpog‘iston Respublikasi, barcha viloyatlar va Toshkent shahrida mobil qurilmalarning IMEI kodlarini ro‘yxatdan o‘tkazish punktlari mavjud. Tizim operatori mamlakatimizning barcha hududlarida xizmat ko‘rsatish shoxobchalarini ochishda davom etmoqda.
Bir oydan buyon mamlakatimizdagi eng yirik savdo majmualaridan biri bo‘lgan “Malika” bozorida tizim operatorining punkti faoliyat yuritib kelmoqda. Savdo majmuasiga kelgan har qanday xaridor mobil qurilmani sotib olishdan oldin IMEI kodini ro‘yxatdan o‘tganligi yoki o‘tmaganligini tekshirishi mumkin. Kimning nomidan ro‘yxatdan o‘tganligi (birovning pasport ma’lumotlariga), rasmiy ravishda import qilinganligi to‘g‘risida ma’lumotlarni olish mumkin. Bu xizmatlardan fuqarolar “Malika” majmuasidan chiqmagan holda foydalanishi mumkin.
Eslatib o‘tamiz, iste’molchi (xaridor) ro‘yxatdan o‘tish jarayoni bilan shug‘ullanmasligi va ro‘yxatga olish uchun to‘lovni amalga oshirmasligi kerak. Ro‘yxatga olish uchun javobgarlik iste’molchi (xaridor)ga emas, importyor (sotuvchi)ga tushadi.
Siz o‘zingiz bilan xorijdan olib kelingan (yoki pochta jo‘natmasi orqali olingan) shaxsiy mobil qurilmalarni faqat UzIMEI tizimining rasmiy ro‘yxatdan o‘tish punktlarida ro‘yxatdan o‘tkazishingizni tavsiya etamiz.
Ma’lumot uchun
2018-yilda mamlakatga rasmiy ravishda 13,5 mingta mobil qurilma import qilingan bo‘lsa, 2019-yilda bu ko‘rsatkich 40 barobarga, 2020-yilda esa 111 barobarga oshgan. Joriy yilning 6 oyi ichida ushbu ko‘rsatkich 850 mingdan oshdi.
Reklama huquqi asosida.
Izoh (0)