“Daryo”da O‘zbekistondagi viloyatlarga rahbarlik qilayotgan hokimlarning qaysi vaksina bilan emlangani ma’lum qilingan material e’lon qilindi. Mazkur maqolada Qashqadaryo hokimi Zoir Mirzayev o‘zbek-xitoy vaksinasi bilan emlangani1 ochiqlangandi. “Xalq so‘zi Online” nashri esa, Qashqadaryo rahbarini “Sputnik-V” vaksinasi bilan emlanganini yozib chiqdi. So‘ngra, Zoir Mirzayev “Sputnik V” vaksinasidan avval o‘zbek-xitoy vaksinasini qabul qilganini bildirdi.
Shundan so‘ng, mazkur masala jamoatchilikda qiziqish uyg‘otdi. “Daryo” muxbiri ko‘pchilikka qiziq bo‘lgan holatni aniqlashtirishga urindi.“Daryo” so‘roviga javob bergan viloyat Sog‘liqni saqlash boshqarmasi axborot xizmati rahbari Nuriddin Egamov boshqarma boshlig‘i Ravshan To‘lakovning “Xalq so‘zi Online” nashriga aytgan gaplarini tasdiqlab, Ravshan To‘lakov Zoir Mirzayevning “Sputnik V” vaksinasidan oldin o‘zbek-xitoy vaksinasini ham qabul qilganini inkor etmayotganini bildirdi.
Mazkur holat haqida qo‘shimcha ma’lumot olish maqsadida “Daryo” muxbiri Zoir Mirzayevning matbuot kotibi — Ahror Sodiqov bilan ham bog‘landi.
“Viloyat rahbari o‘zbek-xitoy vaksinasi bilan ikki marotaba emlangan bo‘lsa-da, antitela ko‘tarilmagani bois boshqa vaksina “Sputnik-V” vaksinasini ham qabul qilgan”, — dedi Ahror Sodiqov vaziyatga izoh berar ekan.
Ahror Sodiqovning aniqlik kiritishicha, Zoir Mirzayev o‘zbek-xitoy vaksinasi bilan aprel oyida, “Sputnik V” vaksinasi bilan esa yaqinda emlangan.
Qashqadaryo hokimi Zoir Mirzayev 2021-yilning 24-aprel kuni koronavirusga chalinib, davolanish uchun Toshkent shahriga jo‘nab ketgandi. Hokimning 2021-yilning 7-may kuni ishga qaytgani ma’lum qilindi.
Eslatib o‘tamiz, Sog‘liqni saqlash vazirligidagi media hollda so‘z olgan Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov Jahon sog‘liqni saqlash tashkiloti gibrit vaksinalar haqida, ya’ni emlanishni boshqa vaksina bilan boshlab, boshqasi bilan tugatish to‘g‘risida o‘ylayotganini ma’lum qilgandi.
Izoh (0)