Ijtimoiy tarmoqlarda “Zo‘ravon maktab direktori farzandlariga qo‘shnisini do‘pposlatdi” sarlavhasi ostidagi videomurojaat tarqaldi. Holat yuzasidan Jarqo‘rg‘on tumani ichki ishlar bo‘limi mas’ul xodimlari tomonidan o‘rganish ishlari olib borildi.
Qayd etilishicha, Jarqo‘rg‘on tumanida 2021-yil 28-iyul kuni, taxminan, soat 11:30 larda “Qumqishloq” mahallasida yashovchi fuqaro B.S., bitta mahallada istiqomat qiluvchi qarindoshlari T.B. va Q.S. o‘zaro tortishib qolib, janjal vaqtida bir-birlarini urib, yengil tan jarohati yetkazgan.
Holat yuzasidan tergovga qadar tekshiruv harakatlarini olib borish jarayonida fuqarolar B.S. va T.B.ga nisbatan sudga oid tibbiy ekspertizalar tayinlangan.
Ma’lum qilinishicha, fuqarolar T.B. va Q.S. mahalla hududida joylashgan guzarda ichimlik suvini olish vaqtida qarindoshi B.S. kelib, telefonida ularni kameraga olgan, bu holatni ko‘rgan T.B. “nimaga kameraga olyapsan?” deya turli xil so‘zlar bilan uni haqorat qilib, janjallashib ketgan.
26-maktab direktori Q.T.ning bu janjalga umuman aloqasi hamda bo‘lib o‘tgan janjaldan xabari yo‘qligi, uning o‘g‘li T.B. janjal qilgani aniqlangan.
Hozirgi kunda T.B., B.S. va Q.S. bir-birlari bilan o‘zaro yarashib olgan. Ular bir-birlariga da’vosi yo‘qligi to‘g‘risida tuman IIB boshlig‘i nomiga ariza bilan murojaat qilgani ma’lum bo‘lgan.
Mazkur holat yuzasidan Jarqo‘rg‘on tumani IIB tomonidan tergovga qadar tekshiruv harakatlari olib borilib, kelgusida qonuniy qaror qabul qilinishi ta’minlanishi ma’lum qilingan.
Bundan avval Qashqadaryoda maktab direktori o‘rinbosarining o‘g‘liga ikki baho qo‘ygan ingliz tili o‘qituvchisi kaltaklangani, Andijonda qimordagi qarzi sabab qo‘shnisini o‘ldirib, hojatxona yaqiniga ko‘mib qo‘ygan yigit 14,5 yilga qamalgani hamda Zangiotadagi COVID-markazda Milliy gvardiya xodimi va fuqaro o‘rtasida janjal sodir bo‘lgani haqida xabar berilgandi.
Izoh (0)