«Дарё»да Ўзбекистондаги вилоятларга раҳбарлик қилаётган ҳокимларнинг қайси вакцина билан эмлангани маълум қилинган материал эълон қилинди. Мазкур мақолада Қашқадарё ҳокими Зоир Мирзаев ўзбек-хитой вакцинаси билан эмлангани1 очиқланганди. «Халқ сўзи Online» нашри эса, Қашқадарё раҳбарини «Спутник-V» вакцинаси билан эмланганини ёзиб чиқди. Сўнгра, Зоир Мирзаев «Спутник V» вакцинасидан аввал ўзбек-хитой вакцинасини қабул қилганини билдирди.
Шундан сўнг, мазкур масала жамоатчиликда қизиқиш уйғотди. «Дарё» мухбири кўпчиликка қизиқ бўлган ҳолатни аниқлаштиришга уринди.«Дарё» сўровига жавоб берган вилоят Соғлиқни сақлаш бошқармаси ахборот хизмати раҳбари Нуриддин Эгамов бошқарма бошлиғи Равшан Тўлаковнинг «Халқ сўзи Online» нашрига айтган гапларини тасдиқлаб, Равшан Тўлаков Зоир Мирзаевнинг «Спутник V» вакцинасидан олдин ўзбек-хитой вакцинасини ҳам қабул қилганини инкор этмаётганини билдирди.
Мазкур ҳолат ҳақида қўшимча маълумот олиш мақсадида «Дарё» мухбири Зоир Мирзаевнинг матбуот котиби — Аҳрор Содиқов билан ҳам боғланди.
«Вилоят раҳбари ўзбек-хитой вакцинаси билан икки маротаба эмланган бўлса-да, антитела кўтарилмагани боис бошқа вакцина «Спутник-V» вакцинасини ҳам қабул қилган», — деди Аҳрор Содиқов вазиятга изоҳ берар экан.
Аҳрор Содиқовнинг аниқлик киритишича, Зоир Мирзаев ўзбек-хитой вакцинаси билан апрель ойида, «Спутник V» вакцинаси билан эса яқинда эмланган.
Қашқадарё ҳокими Зоир Мирзаев 2021 йилнинг 24 апрель куни коронавирусга чалиниб, даволаниш учун Тошкент шаҳрига жўнаб кетганди. Ҳокимнинг 2021 йилнинг 7 май куни ишга қайтгани маълум қилинди.
Эслатиб ўтамиз, Соғлиқни сақлаш вазирлигидаги медиа ҳоллда сўз олган Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков Жаҳон соғлиқни сақлаш ташкилоти гибрит вакциналар ҳақида, яъни эмланишни бошқа вакцина билан бошлаб, бошқаси билан тугатиш тўғрисида ўйлаётганини маълум қилганди.
Изоҳ (0)