Departament hamda DXX organlari tomonidan hamkorlikda o‘tkazilgan tezkor tadbirlarda fuqarolarni o‘qishga kiritish hamda o‘qishini ko‘chirish bilan shug‘ullanmoqchi bo‘lgan firibgarlar hamda talabani yakuniy nazorat imtihonidan o‘tkazib qo‘ymoqchi bo‘lgan dekan o‘rinbosari ushlandi. Bu haqda Bosh prokuratura huzuridagi Departament matbuot xizmati xabar qildi.
Qayd etilishicha, Departament hamda DXXning Chilonzor tumani bo‘limlari tomonidan o‘tkazilgan tezkor tadbirda fuqaro B.A. va boshqalar fuqaro A.ni Qirg‘izistonning tibbiyot yo‘nalishidagi oliy o‘quv yurtiga o‘qishga kiritib, keyinchalik o‘qishini Andijon davlat tibbiyot institutiga ko‘chirish masalasini yuqori lavozimda ishlovchi tanishlari orqali ijobiy hal qilib berish evaziga oldindan kelishilgan 7300 AQSh dollari hisobidan 35,5 million so‘mni olgan vaqtida ashyoviy dalillar bilan ushlangan.
Xuddi shunday, Departamentning Yuqori Chirchiq tuman bo‘limi hamda DXXning Toshkent viloyati boshqarmasi tomonidan o‘tkazilgan tezkor tadbirda fuqaro Sh.I. boshqa bir fuqaroni Chirchiq pedagogika institutiga kontrakt asosida ushbu institutda ishlovchi tanishlari orqali o‘qishga kiritib qo‘yishni va’da qilib, oldindan kelishilgan 3000 AQSh dollari hisobidan 1000 AQSh dollarini olgan vaqtida ashyoviy dalillar bilan ushlangan.
Muqaddam 4 marotaba firibgarlik jinoyatlari uchun sudlangan fuqaro N.T. fuqaro T.ning o‘g‘lini IIV Akademiyasiga tanishlari orqali o‘qishga kiritib qo‘yishga ishontirib, evaziga 1000 AQSh dollarini firibgarlik yo‘li bilan olgan vaqtida Departamentning Muzrabot tumani bo‘limi xodimlari tomonidan ashyoviy dalillar bilan ushlangan.
Shuningdek, Departamentning Buxoro tuman bo‘limi hamda DXXning Buxoro viloyat boshqarmasi tomonidan o‘tkazilgan tezkor tadbirda fuqaro M.Q. boshqa bir fuqaroning hujjatlarini “transfer.dtm.uz” saytida ro‘yxatdan o‘tkazib, Qozog‘istondagi institutga bormasdan turib bir yil o‘qigani haqida sertifikat va transkript hujjatlarini tanishlari orqali tayyorlab berishi evaziga 900 AQSh dollarini olgan vaqtida ashyoviy dalillar bilan ushlangan.
Departament hamda DXXning Samarqand viloyati boshqarmalari tomonidan o‘tkazilgan tezkor tadbirda esa Samarqand davlat chet tillar instituti fakultet dekani o‘rinbosari S.I. fuqaro N.ning ushbu institutda ta’lim olayotgan qizini yakuniy nazorat imtihonidan o‘tkazib berish evaziga 550 dollar olgan vaqtida ashyoviy dalillar bilan ushlangan.
Hozirda mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan avval Andijonda fuqaroni Qirg‘izistonga o‘qishga kiritib qo‘yish evaziga 1,4 ming dollar so‘ragan universitet o‘qituvchisi qo‘lga olingani, Buxoroda hokimlik zaxirasidagi 16 sotix yerni 14 ming dollarga sotishga uringan shaxs ushlangani hamda Andijonda sobiq kadastr xodimi egalik huquqini beruvchi qarorni chiqartirib berish evaziga 15 ming dollar olayotganida qo‘lga olingani haqida xabar berilgandi.
Izoh (0)