Prezident Shavkat Mirziyoyev tadbirkorlar bilan muloqot qilishini ma’lum qilgach, 1217 nafar qashqadaryolik tadbirkor davlat rahbariga murojaat yo‘lladi, deya xabar berdi “Daryo” muxbiri.
Ta’kidlanishicha, davlat rahbariga shikoyat qilgan qashqadaryolik tadbirkorlar 501 ta holatda kredit bilan bog‘liq muammoga duch kelayotganini ma’lum qilgan.
“Prezidentimiz tadbirkorlar bilan muloqot qilishini ma’lum qilgach, 103 nafar dehqonobodlik tadbirkor davlat rahbariga murojaat yo‘llab, muammoga duch kelayotganini ma’lum qilgan. Sektor rahbarlari bilan birga tadbirkorlar bilan uchrashuvga tayyorgarlikning borishi bo‘yicha o‘tkazilgan yig‘ilishdagi topshiriqqa ko‘ra, shu tadbirkorlar bilan muloqot qilyapmiz. Tumanda yechilishi mumkin bo‘lgan muammolarga yechim topyapmiz”, — deydi Dehqonobod tumani hokimi Zoir Aliqulov.
“Daryo” muxbirining aniqlashtirishicha, Prezidentga Qashqadaryoning Dehqonobod tumanidan 103 nafar tadbirkor murojaat qilgan bo‘lsa, Qarshi shahridan 174 nafar, Shahrisabz shahridan 38 nafar, G‘uzor tumanidan 53 nafar, Kasbidan 89 nafar, Kitobdan 61 nafar, Kosondan 68 nafar, Qarshi tumanidan 97 nafar tadbirkor shikoyat yo‘llagan.
Eslatib o‘tamiz, avvalroq Prezidentning tadbirkorlar bilan ochiq muloqoti avgust oyining boshida bo‘lib o‘tishi va shu sabab takliflar 31-iyulgacha qabul qilinishi aytilgandi. Keyinroq tadbirkorlarning Shavkat Mirziyoyevga murojaatlarini qabul qilish muddati 10-avgustga qadar uzaytirildi. Ushbu tadbirda tadbirkorlar oldidagi dolzarb muammolar va ularning yechimlari, respublikada biznes muhitini yanada yaxshilash bo‘yicha taklif va tashabbuslar muhokama qilinadi. Shavkat Mirziyoyev 9-avgust kuni tadbirkorlar bilan uchrashuvga tayyorgarlikning borishi bo‘yicha yig‘ilish o‘tkazdi.
Izoh (0)