Qashqadaryo hokimining koronavirusga chalingani ma’lum qilindi

Qashqadaryo viloyati hokimi Zoir Mirzayev koronavirusga chalindi. Bu haqda viloyat hokimi matbuot kotibi Ahror Sodiqov o‘zining TikTok’dagi sahifasida ma’lum qildi.

Hokim matbuot kotibiga ko‘ra, Zoir Mirzayev bir necha kundan beri kasallikka qarshi davolanmoqda.

“Zoir Mirzayevning koronavirusga chalingani 24-aprel kuni ma’lum bo‘lgan. Ayni paytda viloyat rahbari Toshkent shahrida davolanmoqda”, — deydi Ahror Sodiqov.

Viloyat hokimlari orasida ayni kunga qadar Navoiy viloyati hokimi Qobul Tursunov, Surxondaryo viloyati hokimi To‘ra Bobolovlar kasallikka chalinib, davolanib chiqqan.

Pandemiya davrida vafot etganlar

2020-yil 19-oktabr kuni Kattaqo‘rg‘on tumani hokimi A’zamxon Bahromov vafot etgani haqida xabar berildi. 7-oktabr kuni Andijon viloyati Oltinko‘l tumani hokimi Nazirjon O‘rinboyev va Namangan viloyati hokimi o‘rinbosari Bahromjon Nurmatov uzoq davom etgan xastalikdan so‘ng vafot etgani ma’lum bo‘lgan edi. 29-sentabr kuni Andijon viloyatining Xonobod shahri hokimi Musaxon Mamadaliyev o‘tkir yurak qon-tomir yetishmovchiligi kasalligidan vafot etgani e’lon qilingan edi.

20-sentabr kuni bosh vazir o‘rinbosari O‘ktam Barnoyev, 8-sentabrda Qashqadaryo viloyati Mirishkor tumani hokimi G‘ayrat Begaliyev, 22-avgustda Buxoro viloyati hokimi Karim Kamolov, 31-iyulda Qoraqalpog‘iston rahbari Musa Yerniyazov, 24-iyulda Qoraqalpog‘istonning Qonliko‘l tumani hokimi Daulet Tolibayev vafot etgan. Ularning barchasi koronavirus infeksiyasi asoratlari oqibatida vafot etgan.