Prezidentlikka nomzod Bahrom Abduhalimov obodonlashtirish xodimlarini uyida ishlatgani aytilgan prokurorni tanqid qildi

Ijtimoiy tarmoqlarda Qo‘rg‘ontepa tuman prokurori Obodonlashtirish boshqarmasi xodimlarini noqonuniy ravishda o‘z uyida ishlatganligi to‘g‘risidagi xabar tarqaldi. Ushbu holat yuzasidan “Adolat” partiyasi Siyosiy kengashi raisi, O‘zbekiston prezidentligiga nomzod Bahrom Abduhalimov munosabat bildirdi.

Abduhalimovning ta’kidlashicha, prokuror o‘zgalar mehnatidan foydalangandan so‘ng ularga beriladigan ish haqini ham o‘zi to‘lashi kerak edi.

“Obodonlashtirish boshqarmasi xodimlari ish vaqtida prokurorning hovlisida ‘o‘z ixtiyori’ bilan ishlagan, ularga ajratilgan ish haqi davlat korxonasi hisobidan to‘langan. Janob prokuror mard bo‘lib o‘zgalar mehnatidan foydalanibdi, ish haqini ham budjetdan emas, o‘z hisobidan to‘lasinda endi.

Ko‘pchilik korrupsiya deganda poraxo‘rlik, noqonuniy pul oldi-berdisini tushunadi. Lekin bu illat shoxdor bo‘lib, mansabini suiiste’mol qilishning har qanday turi korrupsiyaga misol bo‘la oladi. Qo‘rg‘ontepadagi mazkur holat ham korrupsiyaning o‘zginasidir.

Hashar — azaliy va milliy qadriyatimiz, u obodlikka beshik. Lekin, afsuski, mazkur vaziyatda korrupsion holatga ‘hashar’ niqobi kiygizilib, ikki karra jinoyatga qo‘l urilmoqda (korrupsiya va yolg‘on). Obodonlashtirish boshqarmasi xodimlarining ham ish vaqti va quvvati chegaralangan. Qaniydi prokurorning uyiga sarflagan vaqt va mehnatlarini yurtimizning biror maskani chiroy ochishiga bag‘ishlay olganlarida...

Qonun barchaga barobar. Shunday ekan uning himoyachilari ham bunga amal qilishga majbur”, — deydi Abduhalimov.

Shuningdek, partiya vakili bu holatda Obodonlashtirish boshqarmasi rahbarlarining ham aybi borligini ma’lum qilgan.

“Shu o‘rinda Obodonlashtirish boshqarmasi rahbarlariga ham e’tiroz bor. Nega ular o‘z xodimlari huquqini himoya qilib, mehnatlaridan maqsadli foydalana olmayapti? Bunday iltimos (to‘g‘rirog‘i topshiriq) bilan chiqqan prokurorga nega rad javobini berolmaydi? Tili qisiq joyi bormi? Xatolari fosh bo‘lishidan qo‘rqadimi? Xodimlar-ku, bir sodda, oddiy odamlar, ammo rahbar prokuraturaga qaram tashkilot emasligini anglab, o‘z so‘zini ayta olishi kerak edi-ku. Bunday laganbardorliklar qachon barham topadi?

‘Adolat’ SDP korrupsiyani ildizi bilan quritishga intilayotgan siyosiy kuch sifatida bunday illatli holatlarga jo‘yali va jiddiy chora ko‘rilishi va qayta takrorlanmasligi uchun izchil kurashish tarafdori”, — deydi Bahrom Abduhalimov.

Ma’lumot uchun, ushbu holat yuzasidan prokurorga nisbatan xizmat tekshiruvi tayinlangan.