Buxoro viloyatining Qorovulbozor tumanida tuman tibbiyot birlashmasi mas’ul xodimi fuqaroni hamshiralikka ishga joylashtirish evaziga undan 400 dollar olayotganida qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, Qorovulbozor tuman tibbiyot birlashmasi mas’ul xodimi Sh.N. bir necha yildan buyon ish izlab yurgan fuqaro G.J. ning ishonchiga kirib, uni birlashmaning xirurgiya bo‘limida yarim stavka hamshiralik vazifasiga ishga joylashtirishini va’da qilib, evaziga undan 400 dollar talab qilgan. Buncha miqdordagi mablag‘ga ega bo‘lmagan G.J. tibbiyot birlashma mas’ul xodimining xatti-harakatlari yuzasidan huquq-tartibot idoralariga ariza bilan murojaat qilgan.Buxoro viloyat IIB hamda Bosh prokuratura huzuridagi Iqtisodiy jinoyatlarga qarshi kurashish departamentining viloyat boshqarmasi xodimlari hamkorligida tezkor tadbir uyushtirilgan. Tezkor tadbir davomida tibbiyot birlashma mas’ul xodimi Sh.N. fuqaro G.J.dan 400 dollar pora olayotganida ushlangan.
Holat yuzasidan Jinoyat kodeksining 168-moddasi 1-qismi (firibgarlik) bilan jinoyat ishi qo‘zg‘atilib, dastlabki tergov harakatlari olib borilmoqda.
Mavzuga doir:
- Andijonda sud orqali yerdan foydalanish huquqini beruvchi qarorni chiqartirib berishni va’da qilib, 300 dollar olgan shaxs qo‘lga olindi
- Andijonda fuqaroni Qirg‘izistonga o‘qishga kiritib qo‘yish evaziga 1,4 ming dollar so‘ragan universitet o‘qituvchisi qo‘lga olindi
- Buxoroda hokimlik zaxirasidagi 16 sotix yerni 14 ming dollarga sotishga uringan shaxs ushlandi
Izoh (0)