Президентликка номзод Баҳром Абдуҳалимов ободонлаштириш ходимларини уйида ишлатгани айтилган прокурорни танқид қилди

Ижтимоий тармоқларда Қўрғонтепа туман прокурори Ободонлаштириш бошқармаси ходимларини ноқонуний равишда ўз уйида ишлатганлиги тўғрисидаги хабар тарқалди. Ушбу ҳолат юзасидан «Адолат» партияси Сиёсий кенгаши раиси, Ўзбекистон президентлигига номзод Баҳром Абдуҳалимов муносабат билдирди.

Абдуҳалимовнинг таъкидлашича, прокурор ўзгалар меҳнатидан фойдалангандан сўнг уларга бериладиган иш ҳақини ҳам ўзи тўлаши керак эди.

«Ободонлаштириш бошқармаси ходимлари иш вақтида прокурорнинг ҳовлисида ‘ўз ихтиёри’ билан ишлаган, уларга ажратилган иш ҳақи давлат корхонаси ҳисобидан тўланган. Жаноб прокурор мард бўлиб ўзгалар меҳнатидан фойдаланибди, иш ҳақини ҳам бюджетдан эмас, ўз ҳисобидан тўласинда энди.

Кўпчилик коррупция деганда порахўрлик, ноқонуний пул олди-бердисини тушунади. Лекин бу иллат шохдор бўлиб, мансабини суиистеъмол қилишнинг ҳар қандай тури коррупцияга мисол бўла олади. Қўрғонтепадаги мазкур ҳолат ҳам коррупциянинг ўзгинасидир.

Ҳашар — азалий ва миллий қадриятимиз, у ободликка бешик. Лекин, афсуски, мазкур вазиятда коррупцион ҳолатга ‘ҳашар’ ниқоби кийгизилиб, икки карра жиноятга қўл урилмоқда (коррупция ва ёлғон). Ободонлаштириш бошқармаси ходимларининг ҳам иш вақти ва қуввати чегараланган. Қанийди прокурорнинг уйига сарфлаган вақт ва меҳнатларини юртимизнинг бирор маскани чирой очишига бағишлай олганларида...

Қонун барчага баробар. Шундай экан унинг ҳимоячилари ҳам бунга амал қилишга мажбур», — дейди Абдуҳалимов.

Шунингдек, партия вакили бу ҳолатда Ободонлаштириш бошқармаси раҳбарларининг ҳам айби борлигини маълум қилган.

«Шу ўринда Ободонлаштириш бошқармаси раҳбарларига ҳам эътироз бор. Нега улар ўз ходимлари ҳуқуқини ҳимоя қилиб, меҳнатларидан мақсадли фойдалана олмаяпти? Бундай илтимос (тўғрироғи топшириқ) билан чиққан прокурорга нега рад жавобини беролмайди? Тили қисиқ жойи борми? Хатолари фош бўлишидан қўрқадими? Ходимлар-ку, бир содда, оддий одамлар, аммо раҳбар прокуратурага қарам ташкилот эмаслигини англаб, ўз сўзини айта олиши керак эди-ку. Бундай лаганбардорликлар қачон барҳам топади?

‘Адолат’ СДП коррупцияни илдизи билан қуритишга интилаётган сиёсий куч сифатида бундай иллатли ҳолатларга жўяли ва жиддий чора кўрилиши ва қайта такрорланмаслиги учун изчил курашиш тарафдори», — дейди Баҳром Абдуҳалимов.

Маълумот учун, ушбу ҳолат юзасидан прокурорга нисбатан хизмат текшируви тайинланган.