Tashqi ishlar vazirligida 2021-yilning 11-avgust kuni vazirlik xodimlari va O‘zbekistonning xorijdagi diplomatik vakolatxonalari vakillari ishtirokida “Xorijdagi O‘zbekiston fuqarolarining saylovdagi ishtirokini keng ta’minlash: me’yoriy huquqiy asoslar, imkoniyatlar va mexanizmlar” mavzusida davra suhbati bo‘lib o‘tdi.
Unda oktabrda bo‘lib o‘tadigan Prezident saylovida xorijda istiqomat qilayotgan O‘zbekiston fuqarolarining ishtirokini ta’minlash masalasi muhokama qilingan.
Qayd etilishicha, O‘zbekistonning diplomatik vakolatxonalari mavjud bo‘lgan 38 ta davlatda 54 ta (55 ta dipvakolatxona, O‘zbekistonning Nyu-Yorkdagi bosh konsulxonasi va BMTdagi vakolatxonasida birgalikdagi) statsionar saylov uchastkasi tashkil etiladi. Qolaversa, ushbu davlatlarning 128 ta shahrida va diplomatik vakolatxonalar mavjud bo‘lmagan 11 davlatda qo‘shimcha ravishda jami 316 ta ko‘chma saylov punkti tayyorlanishi reja qilingan.
Ta’kidlanishicha, dipkorpus va konsullik muassasalari tomonidan saylovni xorijda yuqori saviyada o‘tkazish maqsadida mahalliy hokimiyat, diasporal tashkilotlar hamda o‘zbekistonlik mehnat migrantlari ko‘p joylashgan korxona rahbarlari bilan uchrashuvlar o‘tkazilmoqda.
Diplomatik vakolatxonalardan to‘plangan ma’lumotlarga ko‘ra, chet eldagi saylovchilarning birlamchi ro‘yxati shakllantirilgan. Diplomatik vakolatxonalar tomonidan chet eldagi 151 o‘zbek diasporal tashkiloti bilan hamkorlik aloqalari o‘rnatilgan.
Bundan tashqari, vazirlik taklifi asosida O‘zbekiston Tashqi mehnat migratsiyasi agentligi tomonidan 34 ta xorijdagi o‘zbek diasporasi bilan chet davlatlarda vaqtincha mehnat faoliyatini olib borayotgan O‘zbekiston fuqarolarining bandligini ta’minlash va ularning huquq hamda manfaatlarini himoya qilish sohasida hamkorlik kelishuvlari imzolangan.
Bundan avval O‘zbekiston Prezidenti saylovlarini o‘tkazish uchun saylov okruglari tashkil etilgani, Maqsuda Vorisova Prezidentlik saylovida g‘alaba qozonsa, islohotlarni nimadan boshlashini ma’lum qilgani hamda Prezident saylovi munosabati bilan O‘zbekistonga kelgan DIIHBning ilk missiyasi xulosalari haqida ma’lumot berilgani haqida xabar berilgandi.
Izoh (0)