“Agrobank” tashabbusiga ko‘ra, xalqaro ekspertlar bilan hamkorlikda sohadagi mutaxassislarni qayta tayyorlash va xorijiy tajribalarga asoslangan eng so‘nggi zamonaviy bilimlarni berish, ularning mahoratini oshirish maqsadida, “O‘simliklarni himoya qilish bilimlari” o‘quv kursi yo‘lga qo‘yildi. Mazkur o‘quv kursining sentabrdan dekabrgacha davom etadigan mavsumi uchun qabul boshlandi.
Unda qishloq xo‘jaligi bo‘yicha bakalavr darajasiga ega bo‘lgan mutaxassislarni o‘simliklarni himoya qilish yo‘nalishida qayta tayyorlash, xorijiy tajribalarga asoslangan eng so‘nggi zamonaviy bilimlar berish ko‘zda tutilgan bo‘lib, tinglovchilar qishloq xo‘jaligining 7 ta yo‘nalishi:
- entomologiya;
- fitopatologiya;
- girbologiya;
- nematologiya;
- virologiya;
- toksikologiya;
- tuproqshunoslik bo‘yicha xorijiy tajribalar asosida mahorat darslarini o‘tashadi.
Darslar jahon standartlariga to‘liq javob beradigan o‘quv auditoriyalari va ushbu kurs uchun maxsus jihozlangan laboratoriya xonalarida, o‘simliklarni himoya qilish tajribasiga ega o‘qituvchilar va ilmiy mutaxassislar hamda soha vakillari ishtirokida olib boriladi.
Ushbu o‘quv dasturi qishloq xo‘jaligida ilk zamonaviy dastur sifatida Qishloq xo‘jaligi vazirligi, Toshkent davlat agrar universiteti, ilmiy tekshirish institutlari va xalqaro tashkilotlar bilan hamkorlikda yo‘lga qo‘yilgan bo‘lib, o‘quv dasturi asosan nazariy va amaliy ko‘nikmalarni rivojlantirishga qaratilgan. Amaliyot darslari ilmiy tekshirish institutlarining laboratoriya xonalarida o‘tkaziladi.
Sohada yuqori malakali, xalqaro tajribaga ega o‘qituvchilardan bilim olish imkoniyati, nazariy va amaliy mashg‘ulotlarning uyg‘unligi, sohadagi yetakchi bilim egalari va xalqaro tajribaga ega bo‘lgan mutaxassislar ishtirokidagi master klasslarda qatnashish, kelajakda xalqaro hamkorlar bilan ilm almashish imkoniyati treningning asosiy afzalliklari qatoriga kiradi.
Bitiruvchilar o‘qish davomida olgan bilimlari asosida tegishlicha baholanadi va o‘quv kursi yakunida bitiruvchilarga maxsus sertifikatlar beriladi. Xalqaro toifadagi mutaxassislar tomonidan olib boriladigan kurslar mutlaqo bepul bo‘lib, barcha xarajatlar “Agrobank” tomonidan qoplanadi. Kursni muvaffaqiyatli tamomlaganlar ish bilan ta’minlanadi.
Kursga qatnashmoqchi bo‘lganlar quyidagi uch bosqichdan o‘tishlari talab etiladi:
1. onlayn so‘rovnomani to‘ldirish;
2. imtihon (yozma);
3. suhbat.
Arizalar 20-avgustga qadar Agrolab_uzbot Telegram-boti yoki agrolab.fermermaktab.uz sayti orqali qabul qilinadi. Suhbatdan muvaffaqiyatli o‘tganlar 2-sentabrdan boshlab darslarda qatnashib, bilim olish imkoniga ega bo‘lishadi.
Batafsil ma’lumot uchun:
Reklama huquqi asosida.
Izoh (0)