Apple kompaniyasi AQShda o‘z operatsion tizimlarida bolalarni taqiqlangan kontentlardan himoya qilish maqsadida yangi texnologiyani ishga tushiradi. U ota-onalarni bolalarning jinsiy zo‘ravonligi tasvirlangan suratlar yuborilayotgani va olinayotganidan ogohlantiradi, shuningdek, qidiruv tizimlari va Siri yordamida taqiqlangan kontentlarni qidirishga bo‘lgan urinishlarni aniqlaydi, deb xabar beradi Esquire.
Kuzgi yangilanishdan keyin foydalanishga taqdim etiladigan yangi funksiyalar bolalar xavfsizligi bo‘yicha ekspertlar bilan hamkorlikda yaratilgan. Apple’dagilarning ma’lum qilishicha, kompaniya bolalarni “kommunikatsiya vositalaridan jalb qilish va ekspluatatsiya qilish maqsadida foydalanadigan yirtqichlardan” himoyalashni xohlaydi.
“Xabarlar”dagi yangilanishlar
Apple’ning barcha operatsion tizimlaridagi “Xabarlar” dasturida taqiqlangan kontent haqida ogohlantiruvchi sun’iy intellektdan foydalaniladi. Ta’kidlanishicha, Apple qolgan yozishmalarni o‘qiy olmaydi.
Bundan tashqari, tarkibida ochiq kontent bo‘lgan suratlarni qabul qilishda texnologiya avtomatik ravishda uni chaplab ko‘rsatadi, bola esa ushbu suratni ko‘ra olmasligi haqida ogohlantiriladi. Shuningdek, bola agarda suratni ko‘radigan bo‘lsa, uning ota-onasiga ham bunday imkoniyat berilishidan xabardor qilinadi. Bu kabi xavfsizlik choralari bola taqiqlangan kontentni yuborishni xohlasa ham qo‘llaniladi.
iCloud’da yarimyalang‘och suratlarni qidirish va ma’lumotlarni huquq-tartibot organlariga topshirish
Apple ochiq-sochiq suratlar iCloud’ga yuklanishidan oldin taniy oladi va ma’lumotlarni huquq-tartibot organlariga topshiradi. AQShda kompaniya hisobotlarni Bedarak yo‘qolgan va ekspluatatsiya qilinadigan bolalar milliy markaziga (NCMEC) yuboradi. Tashkilot esa politsiya bilan hamkorlikda ishlaydi.
iCloud’dagi suratlarni o‘rganish ham sun’iy intellekt yordamida amalga oshiriladi, shu sababli Apple boshqa suratlardan foydalana olmaydi. Neyrotarmoqlar bulutli ombordagi tasvirlarni tanib, NCMEC va boshqa tashkilotlarga taqdim etadi.
Siri va “Qidiruv” tizimida yangilanishlar
Siri ovozli yordamchisi va “Qidiruv” tizimlarining yangilanishi orqali foydalanuvchi CSAM’ga bog‘liq ma’lumotlarni topishni xohlaganida ogohlantiriladi. U qidirayotgan narsasi “og‘riqli mavzu” ekanligi haqida bildirishnoma oladi va ushbu muammo haqida batafsil o‘qishi mumkin bo‘ladi.
Shuningdek, Siri bolalar va ularning ota-onalariga jinsiy zo‘ravonlik holatida qanday chora ko‘rish kerakligi haqida ma’lumot beradi. Xususan, tegishli so‘rov amalga oshirilganda ovozli yordamchi foydalanuvchiga bolalar xavfsizligiga bog‘liq resurslarga o‘tishni taklif qiladi.
Izoh (0)