Apple болалар ҳимоясини кучайтиради: алгоритмлар «Хабарлар»даги очиқ суратларни чаплаб қўяди, iCloud’ни текширади ва Siri’га тавсиялар беради

Apple компанияси АҚШда ўз операцион тизимларида болаларни тақиқланган контентлардан ҳимоя қилиш мақсадида янги технологияни ишга туширади. У ота-оналарни болаларнинг жинсий зўравонлиги тасвирланган суратлар юборилаётгани ва олинаётганидан огоҳлантиради, шунингдек, қидирув тизимлари ва Siri ёрдамида тақиқланган контентларни қидиришга бўлган уринишларни аниқлайди, деб хабар беради Esquire.

Кузги янгиланишдан кейин фойдаланишга тақдим этиладиган янги функциялар болалар хавфсизлиги бўйича экспертлар билан ҳамкорликда яратилган. Apple’дагиларнинг маълум қилишича, компания болаларни «коммуникация воситаларидан жалб қилиш ва эксплуатация қилиш мақсадида фойдаланадиган йиртқичлардан» ҳимоялашни хоҳлайди.

«Хабарлар»даги янгиланишлар

Apple’нинг барча операцион тизимларидаги «Хабарлар» дастурида тақиқланган контент ҳақида огоҳлантирувчи сунъий интеллектдан фойдаланилади. Таъкидланишича, Apple қолган ёзишмаларни ўқий олмайди.

Бундан ташқари, таркибида очиқ контент бўлган суратларни қабул қилишда технология автоматик равишда уни чаплаб кўрсатади, бола эса ушбу суратни кўра олмаслиги ҳақида огоҳлантирилади. Шунингдек, бола агарда суратни кўрадиган бўлса, унинг ота-онасига ҳам бундай имконият берилишидан хабардор қилинади. Бу каби хавфсизлик чоралари бола тақиқланган контентни юборишни хоҳласа ҳам қўлланилади.

iCloud’да яримяланғоч суратларни қидириш ва маълумотларни ҳуқуқ-тартибот органларига топшириш

Apple очиқ-сочиқ суратлар iCloud’га юкланишидан олдин таний олади ва маълумотларни ҳуқуқ-тартибот органларига топширади. АҚШда компания ҳисоботларни Бедарак йўқолган ва эксплуатация қилинадиган болалар миллий марказига (NCMEC) юборади. Ташкилот эса полиция билан ҳамкорликда ишлайди.

iCloud’даги суратларни ўрганиш ҳам сунъий интеллект ёрдамида амалга оширилади, шу сабабли Apple бошқа суратлардан фойдалана олмайди. Нейротармоқлар булутли омбордаги тасвирларни таниб, NCMEC ва бошқа ташкилотларга тақдим этади.

Siri ва «Қидирув» тизимида янгиланишлар

Siri овозли ёрдамчиси ва «Қидирув» тизимларининг янгиланиши орқали фойдаланувчи CSAM’га боғлиқ маълумотларни топишни хоҳлаганида огоҳлантирилади. У қидираётган нарсаси «оғриқли мавзу» эканлиги ҳақида билдиришнома олади ва ушбу муаммо ҳақида батафсил ўқиши мумкин бўлади.

Шунингдек, Siri болалар ва уларнинг ота-оналарига жинсий зўравонлик ҳолатида қандай чора кўриш кераклиги ҳақида маълумот беради. Хусусан, тегишли сўров амалга оширилганда овозли ёрдамчи фойдаланувчига болалар хавфсизлигига боғлиқ ресурсларга ўтишни таклиф қилади.