Tokio—2020. Kurashchi Bekzod Abdurahmonov o‘tish bahsida g‘alaba qozondi va bronza uchun kurashadi. Rio—2016 sovrindorida mag‘lubiyat, kanoechilar esa yarim finalga chiqdi

Tokio—2020 Olimpiadasida 6-avgust kuni bir qator o‘zbekistonlik sportchilar o‘z ishtirokini o‘tkazdi.

Kanoeda eshkak eshish bo‘yicha O‘zbekiston sharafini himoya qilayotgan Dilnoza Rahmatova hamda Nilufar Zokirova 500 metr masofaga o‘tkazilgan saralash bahslarida 2:04.854 daqiqa vaqt sarflab, to‘rtinchi o‘rinni egalladi va chorak finalda qatnashadigan bo‘ldi. Juftlik chorak finalda 2:04.450 daqiqada ikkinchi bo‘lib marraga yetib keldi va yarim final yo‘llanmasiga ega chiqdi.

Koronavirus sabab badiiy gimnastika bo‘yicha bahslarda qatnasha olmagan Sabina Toshkenboyeva o‘rniga Yekaterina Fetisova bahslarda ishtirok etmoqda. Ikkita bosqichdan keyin Fetisova so‘nggi o‘rinlarda bormoqda.

Erkin kurash bo‘yicha Rio—2016 Olimpiadasi sovrindori Magomed Ibragimov (-97 kg) dastlabki bellashuvda turkiyalik Sulaymon Karadenizga yutqazib qo‘ydi. Shu tariqa Ibragimov bronza medali uchun kurash imkoniyatiga ega bo‘lish uchun Sulaymonning finalga chiqishiga umid qiladi.

Yana bir erkin kurashchi Bekzod Abdurahmonov (-74 kg) bronza medali uchun o‘tish bahsida Gvineya-Bissau vakili Augusto Midanani taslim etdi. Shu tariqa Bekzod bronza medali uchun qozog‘istonlik Daniyar Kaysanovga qarshi gilamga chiqadi. Bellashuv Toshkent vaqti bilan 15:40 da boshlanadi.