Franchesko Tottidan Mirko Vuchinichgacha. “Roma” tarixidagi eng yaxshi 21 to‘purar

O‘zbekistonlik hujumchi Eldor Shomurodov Italiyaning qadimiy va mashhur klublaridan biri “Roma” futbolchisiga aylandi. “Bo‘rilar” safida doim o‘ziga xos hujumchilar va gol urishni yoqtiradigan yarim himoyachilar bo‘lgan. Ushbu sahifada “Roma” tarixidagi eng yaxshi to‘purarlar haqida so‘z boradi.

“Roma” — 1927-yil 7-iyunda tashkil topgan professional jamoa. Uy o‘yinlarini Rimning “Olimpiko” stadionida o‘tkazadi. Klub tashkil etilganidan buyon A Seriyaning bir mavsumida ishtirok eta olmagan, xolos. O‘z tarixida 3 marta Italiya chempionligi, 9 marta Italiya Kubogi, 2 marta Italiya Superkubogi sohibiga aylangan.

21-o‘rin: Antonio Kassano

• Fuqaroligi: Italiya
• Pozitsiya: hujumchi
• Gollar soni: 52
• O‘yinlar soni: 161
• “Roma”dagi faoliyati: 2001—2006

Italiyalik hujumchi 2001—2006-yillar mobaynida “Roma”da o‘ynagan. Bu vaqt oralig‘ida Kassano rimliklar safida 161 o‘yinda maydonga tushib, 52 ta gol urishga muvaffaq bo‘lgan. Yaxshi o‘yin ko‘rsatishi bilan birgalikda futbolchi rahbariyat va murabbiy bilan nizolashib qoladi. Shu sababli “Roma”da yorqin faoliyat olib borolmaydi.

20-o‘rin: Karlo Galli

• Fuqaroligi: Italiya
• Pozitsiya: hujumchi
• Gollar soni: 54
• O‘yinlar soni: 125
• “Roma”dagi faoliyati: 1951—1956

Hujum chizig‘ida o‘ynaydigan italiyalik futbolchi “Roma”, “Milan” klublari va Italiya terma jamoasidagi harakatlari bilan mashhur. “Roma” safida o‘tkazgan 5 mavsumi davomida nafaqat asosiy tarkib futbolchisi, balki jamoaning eng yaxshi to‘purari ham edi. Uning statistikasi bir o‘yinga o‘rtacha 0,43 ta gol to‘g‘ri keladi. Italiya terma jamoasida ham 13 ta o‘yinda ishtirok etib, 5 ta gol urgan.

19-o‘rin: Rujero Ritssitelli

• Fuqaroligi: Italiya
• Pozitsiya: hujumchi
• Gollar soni: 55
• O‘yinlar soni: 211
• “Roma”dagi faoliyati: 1988—1994

Italiyalik hujumchi eng yorqin yillarini “Roma”da o‘tkazgan. “Bo‘rilar” safidagi 6 mavsumi davomida Italiya Kubogini qo‘lga kiritishga muvaffaq bo‘lgan. Rujero 211 o‘yinda raqiblar darvozasini 55 marta ishg‘ol qilgan.

18-o‘rin: Mansini

• Fuqaroligi: Braziliya
• Pozitsiya: hujumkor yarim himoyachi
• Gollar soni: 59
• O‘yinlar soni: 222
• “Roma”dagi faoliyati: 2003—2008

Braziliyalik futbolchi 2003-yildan to 2008-yilgacha “Roma” sharafini himoya qilgan. Rimlik muxlislar Mansinini chiroyli va eng asosiysi muhim gollari bilan eslab qolgan. Yarim himoyachi 222 o‘yinda 59 ta gol urgan.

17-o‘rin: Arturo Chini Luduena

• Fuqaroligi: Argentina
• Pozitsiya: hujumchi
• Gollar soni: 62
• O‘yinlar soni: 180
• “Roma”dagi faoliyati: 1927—1934

Argentinalik futbolchi 1927-yildan 1934-yilgacha “bo‘rilar” sharafini himoya qilgan. Aytib o‘tish joiz, Arturo Italiya fuqaroligiga ham ega bo‘lgan va Italiya terma jamoasida o‘ynagan. Rimliklar safida 180 bahsda ishtirok etib, 62 ta gol urgan. Muxlislar va jurnalistlar uni “advokat” deb chaqirardi.

16-o‘rin: Daniele de Rossi

• Fuqaroligi: Italiya
• Pozitsiya: tayanch yarim himoyachi
• Gollar soni: 63
• O‘yinlar soni: 616
• “Roma”dagi faoliyati: 2002—2019

De Rossi — “Roma”ga sodiq futbolchilardan biri. A Seriyaning eng yaxshi yarim himoyachisi deb tan olingan. 616 o‘yinda Daniele 63 ta gol urgan. Undan tashqari Italiya terma jamoasi bilan 2006-yilda Jahon Chempionati g‘olibi bo‘lgan.

15-o‘rin: Mirko Vuchinich

• Fuqaroligi: Chernogoriya
• Pozitsiya: hujumchi
• Gollar soni: 64
• O‘yinlar soni: 204
• “Roma”dagi faoliyati: 2006—2011

Chernogoriyalik futbolchi 2006-yilda “Roma” safiga kelib qo‘shilgan. 2011-yilga qadar Mirko 204 o‘yinda ishtirok etib, 64 ta gol urgan. “Bo‘rilar” safida ikki marta Italiya Kubogi va bir marta Italiya Superkubogini qo‘lga kiritgan.

14-o‘rin: Rudi Fyoller

• Fuqaroligi: Germaniya
• Pozitsiya: hujumchi
• Gollar soni: 68
• O‘yinlar soni: 197
• “Roma”dagi faoliyati: 1987—1992

Germaniyalik hujumchi faoliyatining asosiy qismini “Bayer” va “Roma” jamoalarida o‘tkazgan. Fyoller rimliklar safida 197 o‘yinda 68 ta gol urgan. Germaniya terma jamoasi bilan esa mundial oltin va kumush medallarini qo‘lga kiritgan.

13-o‘rin: Agostino di Bartolomei

• Fuqaroligi: Italiya
• Pozitsiya: himoyachi, yarim himoyachi
• Gollar soni: 69
• O‘yinlar soni: 310
• “Roma”dagi faoliyati: 1973—1984

Italiyalik futbolchi “Roma” akademiyasi tarbiyalanuvchisi hisoblanadi. 4 yil jamoa sardori sifatida maydonga chiqqan va bu vaqt oralig‘ida “Roma” Skudettoni qo‘lga kiritgan. Italiya chempionligi rimliklarga Yevropa Chempionlar Kubogida ishtirok etish huquqini berdi va musobaqadagi debyutidayoq jamoa finalga qadar yetib bordi. 1984-yil 30-mayda bo‘lib o‘tgan finalda Agostino sardor sifatida jamoani maydonga olib tushdi. Di Bartolomei jamoasini penaltilar seriyasiga qadar yetaklab bordi. Birinchi penaltini aniq amalga oshirdi. Afsuski, rimliklardan omad yuz o‘girdi. Lekin o‘yindan so‘ng di Bartolomei finaldagi mag‘lubiyat aybdori bo‘lib qoldi. Barcha uni ayblardi. Oradan 10 yil o‘tib, futbolchi o‘z joniga qasd qiladi. Bunga o‘sha mag‘lubiyat sababchi qilib ko‘rsatiladi.

12-o‘rin: Chezare Augusto Fazanelli

• Fuqaroligi: Italiya
• Pozitsiya: yarim himoyachi
• Gollar soni: 72
• O‘yinlar soni: 184
• “Roma”dagi faoliyati: 1927—1933

O‘tgan asrning 20-yillarida “bo‘rilar” safiga kelib qo‘shilgan futbolchi 184 o‘yinda raqiblar darvozasini 72 marta ishg‘ol qilgan. “Roma” va “Fiorentina” safida maydonga tushib, umumiy hisobda A Seriyada 7 mavsum o‘ynagan.

11-o‘rin: Juzeppe Jannini

• Fuqaroligi: Italiya
• Pozitsiya: yarim himoyachi
• Gollar soni: 75
• O‘yinlar soni: 437
• “Roma”dagi faoliyati: 1981—1996

15 yil davomida “Roma” sharafini himoya qilgan futbolchi 437 ta o‘yinda maydonga tushgan. “Bo‘rilar” akademiyasi tarbiyalanuvchisi jamoa prezidenti Franko Sensi bilan kelisha olmay Rimni tark etishga qaror qiladi. Xayrlashuv o‘yinida jurnalistlarga Jannini: “Mana shu lahzalar uchun butun hayotimni “Roma”ga bag‘ishladim, shunday qilganimdan faxrlanaman”, — degandi.

10-o‘rin: Dino da Kosta

• Fuqaroligi: Braziliya, Italiya
• Pozitsiya: yarim himoyachi, hujumchi
• Gollar soni: 79
• O‘yinlar soni: 163
• “Roma”dagi faoliyati: 1955—1960

Kelib chiqishi braziliyalik bo‘lgan da Kosta Italiyaga kelganidan so‘ng mamlakat fuqaroligini oldi va Italiya terma jamoasida bitta o‘yinda ishtirok etdi. “Roma” safida muvaffaqiyatli faoliyat olib borgan. “Roma” tarixidagi eng yaxshi hujumchilardan biri. Rimdagi 5 yilida Dino 163 o‘yinda ishtirok etib, 79 ta gol urgan.

9-o‘rin: Marko Delvekkio

• Fuqaroligi: Italiya
• Pozitsiya: hujumchi
• Gollar soni: 81
• O‘yinlar soni: 300
• “Roma”dagi faoliyati: 1995—2005

Marko “Roma”dagi faoliyati davomida Italiya chempionligi va Italiya Superkubogini qo‘lga kiritgan. 2002-yildan 2013-yilgacha Rim derbisida eng yaxshi to‘purar hisoblangan. U derbida 9 ta gol urgandi. “Bo‘rilar” safidagi 300 o‘yinida 81 ta golni o‘z hisobiga yozdirib qo‘ygan.

8-o‘rin: Abel Balbo

• Fuqaroligi: Argentina
• Pozitsiya: hujumchi
• Gollar soni: 87
• O‘yinlar soni: 182
• “Roma”dagi faoliyati: 1993—1998, 2000—2002

Abel Balbo “Roma” safida Daniel Fonseka bilan tandem hosil qilib hujum chizig‘ida o‘ynadi. Undan so‘ng Totti bilan juftlikda o‘ynadi. Balbo bir mavsumda 10 tadan kam gol urmasdi. 2000-yilda Rimga qaytib keldi. Ammo bu safar avvalgidek samarador o‘yin namoyish eta olmadi.

7-o‘rin: Edin Jeko

• Fuqaroligi: Bosniya va Gersegovina
• Pozitsiya: hujumchi
• Gollar soni: 91
• O‘yinlar soni: 184
• “Roma”dagi faoliyati: 2015-yildan buyon

Bosniya va Gersegovina terma jamoasi sardori bo‘lgan Jeko 2015-yildan buyon “Roma”da to‘p suradi. Bu vaqt oralig‘ida hujumchi 184 ta o‘yinda ishtirok etib, 91 ta gol urgan. Jeko hali-hamon rimliklar sharafini himoya qiladi va bu raqamlar yanada ko‘payish ehtimoli yuqori.

6-o‘rin: Vinchenso Montella

• Fuqaroligi: Italiya
• Pozitsiya: hujumchi
• Gollar soni: 102
• O‘yinlar soni: 258
• “Roma”dagi faoliyati: 1999—2009

Montella Rimda 10 mavsum o‘tkazgan. Hujumchi “Sampdoriya”dan “Roma”ga kelib qo‘shilgan va debyut mavsumidayoq raqiblar darvozasiga 18 ta gol urishga muvaffaq bo‘lgan. Franchesko Totti va Marko Delvekkio bilan birga hujumda qoyilmaqom uchlik hosil qilgan. Bu “Roma” tarixidagi eng yaxshi hujum uchligidan biriga aylangan. Vinchenso 258 o‘yinda 102 ta gol urgan.

5-o‘rin: Pedro Manfredini

• Fuqaroligi: Argentina
• Pozitsiya: hujumchi
• Gollar soni: 104
• O‘yinlar soni: 164
• “Roma”dagi faoliyati: 1959—1965

Pedro “Roma” legionerlari ichida eng yaxshi to‘purar hisoblanadi. Argentinalik hujumchi 164 ta o‘yinda ishtirok etib, raqiblar darvozasini 104 marta ishg‘ol qilgan. Manfredini “bo‘rilar” bilan Italiya Kubogini qo‘lga kiritgan.

4-o‘rin: Rodolfo Volk

• Fuqaroligi: Italiya
• Pozitsiya: hujumchi
• Gollar soni: 106
• O‘yinlar soni: 161
• “Roma”dagi faoliyati: 1928—1933

Italiyalik hujumchi “Roma” tarixidagi eng muhim futbolchilardan biri. Aynan u “Kapitoliy derbisi”da birinchi golni urgan. Volk 161 o‘yinda 106 marta raqiblar darvozasini ishg‘ol qilgan.

3-o‘rin: Amedeo Amadei

• Fuqaroligi: Italiya
• Pozitsiya: hujumchi
• Gollar soni: 111
• O‘yinlar soni: 234
• “Roma”dagi faoliyati: 1936—1948

Italiyalik hujumchi “Roma” sharafini 12 yil davomida himoya qilib, jamoa tarixidagi eng yaxshi uchinchi to‘purarga aylangan. Amedeo “Roma” akademiyasi tarbiyalanuvchisi hisoblanadi. Hujumchi birinchi golini 15 yoshida urgan. 1942-yildan to 1948-yilgacha “bo‘rilar” sardori bo‘lgan.

2-o‘rin: Roberto Prutsso

• Fuqaroligi: Italiya
• Pozitsiya: hujumchi
• Gollar soni: 138
• O‘yinlar soni: 315
• “Roma”dagi faoliyati: 1978—1988

Roberto uch marta Italiya chempionatining eng yaxshi to‘purariga aylangan. “Roma” tarixidagi eng yaxshi ikkinchi to‘purar. 10 yil davomida “Roma” safida maydonga tushgan hujumchi 315 o‘yinda 138 ta gol urgan.

1-o‘rin: Franchesko Totti

• Fuqaroligi: Italiya
• Pozitsiya: hujumchi
• Gollar soni: 307
• O‘yinlar soni: 786
• “Roma”dagi faoliyati: 1992—2017

Butun faoliyatini “Roma”da o‘tkazgan Totti hujumchi va yarim himoyachi sifatida faoliyat olib borgan. Jamoa tarixidagi eng yaxshi to‘purar va eng ko‘p o‘yin o‘tkazgan futbolchi. Chin ma’nodagi afsona. Franchesko Totti “bo‘rilar” safida 786 o‘yinda ishtirok etib, 307 ta golni o‘z hisobiga yozdirib qo‘ygan.