Токио—2020. Курашчи Бекзод Абдураҳмонов ўтиш баҳсида ғалаба қозонди ва бронза учун курашади. Рио—2016 совриндорида мағлубият, каноэчилар эса ярим финалга чиқди

Токио—2020 Олимпиадасида 6 август куни бир қатор ўзбекистонлик спортчилар ўз иштирокини ўтказди.

Каноэда эшкак эшиш бўйича Ўзбекистон шарафини ҳимоя қилаётган Дилноза Раҳматова ҳамда Нилуфар Зокирова 500 метр масофага ўтказилган саралаш баҳсларида 2:04.854 дақиқа вақт сарфлаб, тўртинчи ўринни эгаллади ва чорак финалда қатнашадиган бўлди. Жуфтлик чорак финалда 2:04.450 дақиқада иккинчи бўлиб маррага етиб келди ва ярим финал йўлланмасига эга чиқди.

Коронавирус сабаб бадиий гимнастика бўйича баҳсларда қатнаша олмаган Сабина Тошкенбоева ўрнига Екатерина Фетисова баҳсларда иштирок этмоқда. Иккита босқичдан кейин Фетисова сўнгги ўринларда бормоқда.

Эркин кураш бўйича Рио—2016 Олимпиадаси совриндори Магомед Ибрагимов (-97 кг) дастлабки беллашувда туркиялик Сулаймон Караденизга ютқазиб қўйди. Шу тариқа Ибрагимов бронза медали учун кураш имкониятига эга бўлиш учун Сулаймоннинг финалга чиқишига умид қилади.

Яна бир эркин курашчи Бекзод Абдураҳмонов (-74 кг) бронза медали учун ўтиш баҳсида Гвинея-Биссау вакили Аугусто Миданани таслим этди. Шу тариқа Бекзод бронза медали учун қозоғистонлик Данияр Кайсановга қарши гиламга чиқади. Беллашув Тошкент вақти билан 15:40 да бошланади.