Tojikiston prezidenti Emomali Rahmon kasallikning oldini olish uchun koronavirusga qarshi emlandi. Bu haqda prezident matbuot kotibi Abdufattoh Sharifzoda ma’lum qildi, deb yozadi Asia-Plus.
U prezident aynan qaysi vaksinani nechta dozada olganiga aniqlik kiritmadi va bunday ma’lumotga ega emasligini aytdi.
Mamlakat Sog‘liqni saqlash vazirligi ma’lumotlariga ko‘ra, respublikaga shu paytgacha uch xil — Britaniyaning AstraZeneca, Xitoyning CoronaVac va AQShning Moderna vaksinalari keltirilgan. Bundan tashqari, norasmiy xabarga ko‘ra, Rossiyaning “Sputnik V” vaksinasi 3 mingta dozada hukumat kasalxonasiga yetkazilgan, ular bilan hukumat a’zolari emlangan.
Ayni vaqtda matbuot kotibi qayd etishicha, davlat rahbari Ayni tumaniga safari chog‘ida tuman rahbariyati va faollari oldida nutq so‘zlab, kasallikning oldini olish, sog‘liqni asrash va koronavirusning yangi shtammlaridan himoyalanish uchun barchani emlanishga chaqirdi.
“Shaxsan men vaksina oldim. Sizga ham emlanishni maslahat beraman. Albatta, vaksinatsiyadan o‘ting va bu kasallik bilan hazillashmang”, — degan Emomali Rahmon.
Prezident uchrashuvda ta’kidlaganidek, aholining katta qismi vaksinatsiya bilan qamrab olingan mamlakatlarda o‘lim statistikasi past.
“Emlangan odam kasal bo‘lgan taqdirda ham, kasallik yengil shaklda kechadi. O‘zingiz, farzandlaringiz va tojik xalqi haqida o‘ylang”, — deya qo‘shib qo‘ydi prezident uchrashuvda.
Iyul oyi oxirida “Ozodi” radiosi o‘z manbalariga tayanib, so‘nggi bir necha hafta ichida Tojikiston prezidentining o‘ndan ortiq yaqin qarindoshlari va oila a’zolari koronavirus simptomlari bilan mamlakatning turli kasalxonalariga yotqizilganini ma’lum qilgandi.
Iyulda Emomali Rahmonning singlisi Qurbonbi Rahmonova va prezidentning qaynanasi O‘zbekbi Asadulloyeva koronavirus oqibatida vafot etdi.
Avvalroq O‘zbekiston Prezidenti Shavkat Mirziyoyev koronavirusga qarshi to‘liq emlangani haqida davlat rahbarining matbuot kotibi Sherzod Asadov ma’lum qilgan edi. “Prezidentimiz mas’uliyatli fuqaro sifatida, albatta, vaksina olganlar. O‘sha vaqtda O‘zbekistonda 3 ta vaksina ro‘yxatdan o‘tgan edi: ZF-UZ-VAC2001, AstraZeneca va ‘Sputnik V’. Prezidentimiz shu vaksinalardan biri bilan to‘liq emlanganlar”, — deya ta’kidlagan Sherzod Asadov.
Qirg‘iziston prezidenti Sadir Japarov 23-iyul kuni koronavirusga qarshi vaksina qabul qildi. Vaksinatsiyadan so‘ng Japarov fuqarolarni undan o‘rnak olib, koronavirusga qarshi emlanishga chaqirdi. Japarov Xitoyda ishlab chiqarilgan Sinopharm vaksinasining birinchi dozasini oldi.
Qozog‘iston prezidenti Qosim-Jo‘mart To‘qayev koronavirusga qarshi Qarag‘anda farmatsevtika zavodida ishlab chiqarilgan “Sputnik V” vaksinasi bilan emlangani haqida aprel oyida ma’lum bo‘lgan edi.
Rossiya prezidenti Vladimir Putin 23-mart kuni koronavirusga qarshi vaksinaning birinchi dozasi bilan emlangandi. Putin omma oldida emlanishdan bosh tortgan. 14-aprel kuni esa Putin vaksinaning ikkinchi dozasini qabul qildi. Uning qaysi vaksina bilan emlangani noma’lum edi. Kreml bu ma’lumotni oshkor qilishdan bosh tortgandi. Keyinroq to‘g‘ridan to‘g‘ri efirdagi xalq bilan muloqot chog‘ida prezidentning o‘zi “Sputnik V” bilan emlanganini ma’lum qildi.
Izoh (0)